Kalay Myo : March 28 ah Chinmi 3 tel in Mi 5 nunnak Liam +Video um sun

March 27 in boruak sosang thok nak Kalay Myo cu March 28 ah ralram vekah a cang.

Mizaan lam ihsin umhmun khuar in timlamnak rak nei ciatu Kalay Myo mino pawl cun an neihsun hriamhrei hmuahhmuah suah in Kawl ralkap le palik pawl cu ralṭha zetin an do thok.

March 28 Zaanlamri in an kapaw thok ih Kawl ralkap le palik pawl cun zangfah lainatnak lungthin nei loin ralpicang doaw tikih hman a si ṭheumi hriamhrei meithal rocket pawl thawn mipi an kap ciamco.

Kalay Myo ih um mipakhat cun “ralram ah ka thleng dah lo nan tui`sun ih kan hmuh ton mi pawl cu ralram ih a cang suak mi vek siding ka zum.”

“Meithal puak le bomb awn pawl cu a ring tukih ka fa le pawl ngaih tuah ah ka mitthli tlak lo dingin ka ṭang ṭenṭo thei fangfang. Asinan, kan Chinmi sungkhat unau an kap that ti kan theih cun ka supaw thei lo. Kan sungkurun in kan ṭap” a ti.

Meithal an hmet puak hnu reituklo ah kawl ralkap pawl ih kah ngah mi Mai Dawt Hnem Sung (AaKhu) in in cem ral san. Cuhnu ah Salai Sangte, Maung Thar Chit, U Thang Hawm Lian le U Ko Min Nyeu te pawl in ralkap meithal kahnak hliamhma tuar in in liam san.

Tahan ih um mipakhat cun “kan hriamhrei nei mi a thlauaw tuk ruangah duh vekin kan cangvai thei lo. An nih ralkap lam cun santhar meithal ṭha phunphun an hmang. Anmah ralkap/palik lam khal ah hliamhma tuar le mithi an um” a ti.

March 28, Kalay Myo ih kahawknak ah Chinmi 3 telin mipi lam mi 5 an thi ih hliamhma tuar 30 hnak ih mallo an um tiah theih a si.

Leave a Reply

Your email address will not be published. Required fields are marked *