Ka innsang pawl ka ngai tuk cun Vansang cuan in ka hnemaw ṭheu – Gen-Z

Min Aung Hlaing hohami kawl ralkap in February 1 ih kumpi cozah thuneihnak an la hnu in ralkap ukhruainak hnuk thlak duh ah Tlangpar hriamhrei keng ralkapbu koptu mino/pacangno an tam zet.

Miṭhenkhat cu meithal kai simlo hnaṭauan har khal ṭuandahlo, thudik dinpi ngam ruangih Tlangpar ralkapbu koptu khal an um.

Cuvek mino/pacangno tamzet cu pumrua thazang zawngin raldo zir nakah harsatnak an tong tiah theih a si ih raldo zir lai Gen-Z pacangno pakhat cun harsatnak an tongmi le hramlak ih tikcucaan an hman dan BBC hnen ah a sim.

Amahcun “Zinglam nazi 5 in kan tho ih harhdamnak hrangah taksa cawlcangnak kan nei hnu, nazi 6 luan hrawngah thawhhlam kan ei. Mallai kan cawl hnu ah raldodan kan zir sal ih nazi 10 hrawngah reilote kan cawl sal. Cuhnu ah cangvaihnak kan nei sal ih zaanlam nazi 5;30 hrawngah kan bang. Nazi 6 hnu cu leng kan suak nawn lo. Nan, kan umnak kilhim in a sangsangten duty kan sawngaw. Cumicu nikhat pumhlum tikcucaan kan hman dan a si” a ti.

Khuasung um mipakhat dinhmun in hramlak ih raldo zir nakah ziangvek harsatnak nan tong tiih thusut nakah “Ei-in, to-din-it nak khalah harsa kan timi tamzet a um. Cun, natnak khal a tamzet. Asancu khuasung ih um ringring kan si tikah hramlak boruak le kan taksa a milaw thei lo. Cuvek a si tikah caan rei cangvaih kan zo lo. Nan, ka pu le pawl khalin in theithiam ih caan sau pipi raldo in zir terlo. Kan cawl phahphah” a ti.

BBC – Asile hivek harsatnak nan tong ding ti hi nan rak ruat ban cia maw?

Gen-Z – Maang khalah kan man dah mi a si lo. Lamzawhnak men in le khuasung ih mino rual cangvaihnak men in SAC ralkap kan neh thei loding ti kan thei ruangah rualpi pawl thawn sawm khawmaw in raldo kan zir hi a si.

BBC – A hlan ih nan dinhmun le atu hramlak ih nan dinhmun hi a thlau aw zet sikhawh, hmailam caansau hrangah teh ziangtin khawsa nan tum?

Gen-Z – Athupibik pakhat cu kan thinlung hi a si. Thanau loding a thupi zet. Kan ruapi karlak khalah thanau cauraunak um lo dingin kan bawm aw ton ringring.

BBC – Tlangpar ralkapbu kop dingin Yangon ihsin nan poksuak lai le lamlak ah teh harsatnak nan tong maw?

Gen-Z – Harsa zet. Direct pehtlaihnakding kan theilo tikah mi hranhran kan sut ton vivo. Cuvek laiah miṭhen bum kan tuar. Cumi khami hnen ah direct in kan lo hruai ding tiih paisa dil ih mibumtu khal an um. Cun, ziinpi kan zawh ngamlo ih zaan lai ah hramlak ihsin kan feh ṭheu tikah a har zet. Rawl ei loin nikhat pumhlum rawlhmei caan khal a um. Cutawkin in hngak uh in ti ih nikhat sung kan hngaklak caan khal a tam.

BBC – Hih hmun ih na feh hi na siraw maw?

Gen-Z : Sirawlo. Kan rualle zaten kan kim thluh ih mah le mah kan sutaw tikah ka siraw titu an um lo. Kei khal keimahten ka sutaw ih ka siraw hrimhrim lo. Asancu Daan loih rampi thuneihnak latu SAC ralkap do dingah a tui` kan zawh mi lamziin hi a ṭhabik umsun a si ti kan thei ciang tuk.

BBC – Tlangpar rakapbu kop ding thu ah teh nan sungte pawl in an lo kham maw?

Gen-Z – In kham. Ka nu le pa siseh, ka nupi khal thuṭhaten ka simfiang. Nan, mitthli le canghnap thawn kan thlahaw.

BBC – Na nu, pa le innsangnu teh nangai hai maw?

Gen-Z – Ka nu le pa cu in seherh tukding ka phang ih direct in ka phone tuk hai lo. Nan, kan nu cu ka biak ringring. Ka thuhla khal a mah in ka nu le pa hnen ah in simsak ṭheu. Ka ngai hai tuk caan ahcun Vansang cuan in an hmuithlam ka cuangter. A caan le phone ih an zuk ka zoh ṭheu. Ka ngai tuk caan ahcun Vansang cuan in kei mah ten ka hnemaw ṭheu …. Kimciang in hinah Video zoh …

Leave a Reply

Your email address will not be published. Required fields are marked *