July 27 zaan ih Ziinan Pipeline siattu cu Midang an rak si ziar

July 27 zaan nazi 8 hrawngah Mon ramkulh, Thaton (သထုံ) peng, Sakhangyi khua kiang ih SAC ralhraang gas pipeline cu Mon PDF pawl in bomb thawn an puah siat tiah internet cahmai ah thuthang a suak nan Mon PDF ṭuanvonei mipakhat cun an mah cangvaihnak a si lo thu Shan hrambun media hnen ah a relsuak.

Amahcun “Online ih an theh darh mi thuthang kha a dik lo. Kan nih thawn pehparawknak zianghman a um lo. Duhsan nei in an thlah hrimmi a si. Leitlun mipi hmai ah PDF hmai an ti bal tummi a si” tiah STN hnen ah a sim ih “SAC ralhraang cangvaihnak a si” a ti.

Ziinan pipeline hi ralhraang ta si in le Thailand ram ih hruailutmi sivekin online ah thuthang a darh nan kiangkap khuami pawl cun ramsung ih hmanmi pipeline sawn a si tiah an ti.

Ziinan pipeline a puakkuaimi thu thawn pehpar in Thaton khuami mipakhat cun “Zaan nazi 9 hrawngah puak kuai thawm ring zet a suak ih thil rim sia zet khuasung ah a naam thluh. Ralbuai ah ruatin beunak hawltu an um ih a tangta pawl khal thinphang in ṭhiṭhaten kan it thei lo. ”

“Zing khuavang ah kan va zoh cu ziinan pipeline puakmi a rak si. A rim a sia zetih lamziin pawl khal ziinan rong a kai thluh. Apuak dan hi mahte puakkuai menmi cu a si lo ding. Miṭhen cun PDF pawl cangvaihnak a si tiah an rel nan PDF lam in kan mah cangvaihnak a si lo an ti. PDF cun SAC ralhraang an puh” a ti.

Leave a Reply

Your email address will not be published. Required fields are marked *