Journalist Mratt Kyaw Thu cu raltlan dinhmun in Germany cozah in cohlang duh lo

Leitlunhuap hminthang Myanmar Journalist Mratt Kyaw Thu cu Germany cozah in raltlan dinhmun in a humhim duhlo ruangah Spain ram lam ah beunak hawl in a thleng fel zo tiah theih a si.

Anih hi kum 30 lawng a si lai nan ralram ah thuthang lakin huaisen zetih cangvai ṭheutu a si ih thudik dinpi in teimak huaisen zetih hna a ṭuan nak theihpi in AFP sunloihnak Kate Webb award rak dong dahtu a si.

Journalist pakhat dinhmun in Unity Weekly Journal ah 2010 in hna a ṭuan thok ih Frontiermyanmar, Mizzima, The Myanmar Times le Myanmar Now tvk khalah a ṭuan pehzom ih, atuah Spanish news agency EFE thawn hnaṭuan tlang an si.

Myanmar kumpi cozah thuneihnak latu SAC ralhraang ih warrant suahmi ah telve in rampi a suah san ih Germany ah thla khat zik a um hnu, humhimnak an pe duh lo ruangah Spain ram lam ah beunak hawl in a fehtlang tiah theih a si.

Spain ram ih Mratt Kyaw Thu hnaṭuanpi mipakhat cun “SAC ralhraang in thuthang diklo thehdarhtu tiah puh in April 5 ah kaihtheihnak warrant an suah. Yangon ah zaankhat hnu zaankhat riahnak thleng vivo in a um hnu ah rampi suahsan tumin Border ah zarhteel in a um.”

“Myanmar ramhnen ih Spanish Embassy le EFE tawlrelnak in Europe tlawng theinak Visa a ngah ih raltlan dinhmun in Spain ram ah beunak a hawl tum.”

“Germany, Frankfurt ih thlakhat zik a um ah raltlan dinhmun in humhimnak a dil nan an pe duhlo ruangah June thlathok ah Spain, Madrid khawlipi ah a ra lan sal” a ti.

Mratt Kyaw Thu cu ASEAN meeting ih Min Aung Hlaing fehtum thu le Vanzam a to dingmi tiang rak pholang hmasabiktu a si ih, Singapore in Myanmar ram ah a thupten Vanzam Sii an phur lut ṭum khalah Reuters in pholang hlanpi ah amah in a rak pholang thluh zo.

Myanmar cozah thuthup phuangtu ti`n mipi ih suanvawr zetmi a si ih, atu ah Spain ram ah a um nan rampi buai thu thawn pehpar in thuthang ka ngan pehzom vivo ding a ti.

Mratt Kyaw Thu beunak hawl thu ah Germany in ziangruangah humhimnak a pe duh lo timi le Spain cozah in a cohlang ding maw dinglo ti cu thufelfai a suak lo.

Leave a Reply

Your email address will not be published. Required fields are marked *