Insein Leipar Lilawn ah ting 8000 man Sui le Ngun suamawknak a suak

Tubaiih Sui dawr luhcilhawknak a suak hnu, ni reilote ah Yangon, Insein Leipar Lilawn ah Sui le Lungmankhung suamawknak a suak tiah theih a si.

Suamtuartu unau ka si tiawtu mipakhat cun December 19 ih a unautei` sungkua vanduainak tongmi cu a hnuailam bangtuukin a rel a si.

“December 19, khuathimhlan zaanlam nazi 5 hrawngah Insein ih Sui dawr tuah ka unaute an tlunglam cu Insein leipar Lilawn ihsin taxi pakhatin a rak kham. Dunglam khalin mawṭaw cycle 3 thawn an rak bawh.”

“Mawṭaw a cawl veten hriamhreikeng mi 4 cun sangka ong dingin an fial. Mawṭaw sungah ka uu, a pasal, an fapa le suidawr ihsin an tlunmi suibawm pahnih a um.”

“Ka uute cun sangka an ong duhlo ruangah hriamhrei keng pawl cun thlalang an vuakkuai ih suibawm cu laksak an tum.”

“Ka uu in suibawm a thlah duh lo ruangah a kut ah naam thawn an saat ih thi a suak tamtuk ruangah le a nat tuar loin a kengmi suibawm cu an longsak thei. Ka uu pasal in a dawi tum nan misualrual cu mawṭaw le mawṭaw cycle thawn an tlanhlo suak”.

“Kyat ting 8000 man hrawng a si mi an sui pawl cu misual pawl in an long ngah. Ka uute sungkua cu an thinphang zetih an sunralmi par ah an riahsia zet. An buai lai cu mitṭhep kaar a si. Minute 1 fang hrawng lawng a si. Leipar Lilawn ah midang khal an um nan zohmanin an bawm ngam lo.”

“Atufang kan ram dinhmun cu khawpi lailak khalah duhduh ih sual tuah ngam ding khawp in a sia a si. Curuangah zozokhal, nan vak sukso nakah ralring cio uh la mawṭaw par ah thil mankhungtuk tivek ret hrial tum uh si.”

Economist Intelligence Unit zirzoinak tuahmi ah atufang leitlunhuap khuahimbik cu Denmark khuapi Copenhagen a si ih, himlobik cu Myanmar khuapi Yangon hi a si.

***Zuk remcang tarmenmi a si”

Leave a Reply

Your email address will not be published. Required fields are marked *