Innteek hmasongnak nei lo in Innkhat hnu Innkhat ahlu khong vivotu an um ih Khawmi pawl awloksong in an um

Shan ram, Tachileik myone ukhruainak lam ṭuanvo neitu siseh, veng Lal le biaknaklam siannak thawn ahlu kan khong titu pawl cun innteek lam in kan pe thei lo an ti khal le Innkhat hnu Innkhat lutin ahlu an khong vivo ih, khawmi pawl awloksongin an um.

“Ahlu khong dan cu ṭih lamlam an nung. Hivek ahlu khong ka thei dah lo. Ziangzat kan lo pek ding ka ti tikah mah le sian tawk in ti ih baht 300 ka pe. 600 in pek aw in ti. Innpisung tiang an rung lut. Pek hlan lo an tlan duh lo. Ziangvekin kan sim khal le a theih lo” tiah khawmi pakhat cun a rel.

Ahlu khongtu pawl cun hngakṭah hrang sivekin an rel ih mibur ṭhek aw in an vak kual vivo ti a si.

“Ka dawr ah an ra ve. Nikhat lawngah a hranhran ten mibur 2 rori an ra. An pahnih in hngakṭah hrang sivekin an rel. Mi dangdang kan si an ti ih Shan ram le khaw dang ihsi aratu sivekin an rel aw. Hivekih pumcawm aw an si pei maw ticu ka thei ve lo. Bur 4-5 hrawng an um ih mipa hlir an si bet. Burkhat ah mi 4-5 hrawng an um. Kei mah lawng ka um lai ah an ra lut ih ka thin phang zet. Ahlu kan khong an ti veten ṭih nawn in ka pe lohli hai” tiah khawmi pakhat cun a rel ve.

KhawNu/Pa hruaitu mipakhat cun hitin a rel ve. “Tuikaar ah a hlu khong pawl an ra. Nu le Pa neilo, hngakṭah hrangah an ti. Khawuk lam in hivek pawl hi theihciangnak a um lo cun siannak pek ding a si hrimhrim lo. Hmun hla ihsin kan ra tiawtu phei cu rinhleh an um. Cun, khawmi pawl hrangah a him lo. Kan khua kan ram ah bawm ṭul an um cun Tachileik mipi pawl an tirh siang tuk ko. Hmun ṭhenkhat ahcun hivek pawl hi an cohlang lo.”

“Khawuktu le biaknaklam ṭuanvo lak dingmi a si. Hmunhla ihsin kan ra titu pawl tla cu ziang hrang ah, khawi hmun in… tivek sutfelfai in siannakca tivek an keng le kenglo tivek tiang rak sut ṭheh ding an si. Atuta pawl khal hi mi bum an si le si lo ziang hman kan thei lo” a ti.

SAC ralhraang in rampi ukhruai thuneihnak a la hnu, kan ram a buai hnu in hivekih cangvaitu hmuh ding an tam.

Mibawm ngaingai khal an um nan mibumkual ih vakvaitu khal an um ruangah mipi lam ralring zetih kan um cio a ṭul. Chinram lam khalah mibum cangvaihmang an um lo ding ti sim a theih lo ruangah fimvarten kan um ṭul a si.

Leave a Reply

Your email address will not be published. Required fields are marked *