India i tlanlut Myanmar palik 8 cu Kawlram ah kuatkirsal dingin Myanmar cozah in a beisei

Kawl ralkap ukhruainak hnuai i hnaṭuan huam nawnlo ruangah himnak hawl in India ram ih tlanluttu Myanmar palik 8 cu Kawlram ah kuat kir sal dingin Falam penghuap GAD Deputy Commissioner U Saw Htun Win in Champhai bial cozah hnen ah ca a kuat.

March 5 nikhen mi cuih ca ahcun “Myanmar palik tlansuak mi 8 cu India, Mizoram ah an lut tiah thuthang kan dong. Cumi lakah mipali cu Aizawl ah an thleng zo ih, adang 4 cu Champhai ah an thleng.”

“Ramhnen dinhmun in kan karlak ih pehtlaihawknak hngetkhoh sin dingin India, Mizoram ih tlanlut Myanmar palik 8 cu kan kut ah ap sal dingin kan lo ngen” tiah U Saw Htun Win hminkhenmi dilngennak ca cu Champhai cozah hnen ah an kuat.

Ralkap ukhruainak duhlo in India, Mizoram i tlanluttu Myanmar palik hi an um hnuaihni zo ih, March 4 khalah Myanmar palik 19 cu himnak hawlin India, Mizoram ah an tlan lut tiah Reuters media in a ngan”.

Tuṭum, Myanmar cozah lam in kawlram palik tlansuak pawl kuat kir sal dingin Champhai cozah hnen ih a dilmi thu ah “Delhi ih India’s Ministry for Home Affairs awAnn kan hngak lai” tiah Champhai cozah ṭuanvonei Deputy Commissioner Maria C.T. Zuali in Reuters hnen ah a sim.

February 1 Myanmar rampi a buaithok tir lam ah “himnak hawl in India ram ih raluttu kawlrammi pawl cu Mizoram cozah in theitawk suah in humhim a tum ding” tiah Mizoram cozah in thuthannak an rak nei dah a si.

Leave a Reply

Your email address will not be published. Required fields are marked *