India cozah in Kawlram ralkian pawl a cohlang duh lo nak san

“Myanmar ralkian pawl kan ram security hrangah ṭih an nung” tihi India cozah in Kawlram ralkian a cohlang duhlo nak san phuahlam pakhat a si ih kan ram a buai hnu ih a aupi ringring mi khal a si.

Tuṭum kan rampi a buai ih humhimnak hawl in an ram ih luttu Kawlram mi ziang maw zat lai khal a kuat kir saal zo.

Kaihkhih hnu ah official in SAC ralhraang hnen ih ap mi khal an um thei nan mi tamsawn cu ramri ihsin a nor kir saal hai.

India rampi humhimnak ṭuanvolatu minister cun tuṭum Kawlram a buai hnu, India ram ih luttu Myanmar ralkian mipum 8486 an um mi ah mipum 5,796 cu an ram ah kan nor kir saal tiah August 10, 2021 ah a rak rel dah.

India cozah cun rampi humvennak hrang ruatin a ram ah Kawlram ralkian a lut ter lomi sivekin a rel nan National Crime Records Bureau report 2020 ahcun India ram ih ramdangmi thilsual tuahtu cazin ah Myanmar rammi sual tuah rate cu zaṭek 2 lawng a si.

Cukhalcu thilsual tuahtu um sun ah rape, terror le ralthuam ṭihnung kol ruangih thubuai tuahsak tuar tivek an um lo.

India cozah in Myanmar ralkian pawl an ram humvenawknak hrang ih ṭihnungtu si vek ih a aupi ṭheumi cu 2020 NCRB report hin ruah ding tampi a suak ter tiah Kawlram ralkian le India cozah karlak boruak thlirtu ZK fanai cun a rel.

Amahcun “India cozah in rampi humhimnak hrang ṭih an nung ti`n Kawlram ralkian a cohlang duh lo nak san a rel nan 2020 NCRB report a suak cu ram hrang ṭihnung ding khawp ih sual tuahtu Kawlram mi hmuh ding an um lo. Cumicu 2020 kum sung report a si nan tukum sung khalah ramsung ih sualnak pipa tuahtu Kawlram mi hmuh ding an um hrih lo” a ti.

NCRB report ih tarlang mivek a si le 2020 kumpi sungah India ram ih thilsualtuah puhtuar le thubuai tuahsakmi ramdangmi 7686 an um ih sual tuah rate sangbik cu Bangladesh (zaṭek 25.4), Nigeria (zaṭek 5.5), Nepal (zaṭek 3.3), Myanmar (zaṭek 2.3) le ram dangdang pawl an si.

Mipum zawng in cu thubuai tuahsak Myanmar rammi mipum 179 an um ih Foreigner case in thubuai 71, rit theih lam thawn pehparmi thubuai 5, mithat tum thubuai 7 le thubuai dang 1 ti`n daanpahbaltu tiih thubuai tuahsakmi mipum 179 an um.

Cuvek dinhmun si cing in India cozah in Myanmar ralkain pawl ṭih an nung a ti thotho nak san cu biaknaklam thleidanawknak le politic ruangah a si thei tiah India cozah dinhmun theitu le ramkhel thiamsang ṭhenkhat cun an rel.

India le Pakistan tiih ramhnih a phelkuainak san khal hi biaknaklam ruangah a si ih India ram hi Hindu biaknak, Pakistan a si le Muslim biaknak ti`n an ṭhen aw.

Kum 2014 ih Hindu biaknak hrambun BJP (Modi party) an lal hnu in India ram ih um Muslim pawl an hmakhua a pit phah ding tiah ruahnak a rak um cia ih BJP an lal veten biaknak thawn pehparmi daan thar tuahmi an nei ngaingai.

Kum 2017 khal ah India cozah (BJP party)cun Myanmar ralkian Rohingya refugees (Muslim an tam sawn) pawl cu kan ram security hrang ah ṭihnung an si tiah Supreme Court ah hrenkhamawknak tawlrel dingin ca an theh lut dah.

Tuikum 2021, July thla khal ah India Home Affair Minister Nityanand Rai in “Daan loin kan ram ih luttu Myanmar Rohingya ralkian pawl cu kan ram security hrangah ṭih an nung. Cun, daan loih cangvaihnak neitu an um tiah report a um” ti`n a rak rel dah a si.

Cuihtlunah India President cun kan ram ṭhatnakding hi number 1 ah kan ret a si a ti. A sim duh san cu kan ṭhat nak ding a si cun thilsual tuahtu rampi cozah khal kan dawr thotho ding tithawn a bangaw a si.

Atawi zawngin kan sim a si le India cozah cun Kawlram mipi hnakin an ram hrang ṭhatnak suak ter theitu SAC ralhraang a thlang sawn ih biaknaklam le miphun thleidanawknak kop tel bet in Kawlram ralkian pawl a cohlang duhlo si in a lang. (FOM Opinion)

Leave a Reply

Your email address will not be published. Required fields are marked *