Hnipuan pangai hruk in Ralhraang pawl a thupten cangvai

SAC ralhraang pawl cu Sagaing le Magway ram pawl ah thuamhnaw pangai hruk in a thuten cangvai an hmang thlang.

Mipi bawmtu pawlkom mawṭaw le mawṭaw pangai hmang in an cangvai ih rinlopin khuate le PDF sakhaan luhcilh an hmang.

October 17 khalah Sagaing ramṭhen Sartaung khua ih PDF sakhaan cu Ambulance le mawṭaw cycle thawn rinlopin an luhcilh ih doawknak a suak ruangah PDF sungtel 2 an thi ih nungdam in mipakhat an kai.

Thuamhnaw pangai hruk in le ambulance mawṭaw hmangin Magway ramṭhen, Myaung myone ih PDF sakhaan 3 an luhcilh zo. October 13 ih an luhcilh ṭum ah PDF ta Lai meithal 15 lenglo an lak sak ih mibawmtu pawlkom pawl ih ambulance khal an lak sak tiah PDF ṭuanvonei pakhat in a sim.

“Cuvek dinhmun a si tikah kan mah lam khalin cangvaihdan kan ralring deuh a ṭul. Thuamhnaw pangai hruk in le mawṭaw cycle, ambulance tvk hmangin an cangvai ruangah kan kiang naivai ih mawṭaw sukso ṭhenkhat cu check felnak kan nei ṭheu. Hrokhrol thei bikin an cangvai ih kan nih lam khalin theitawk suahin kan khuapi kan hum” tiah Sartaung hrambun PDF hruaitu pakhat cun a rel.

Sagaing le Magway ram hi rampumhuap PDF hriamkaibu cangvai theibiknak le cangvaih rembiknak hmunram pakhat a si ih doawknak a suak tik khalah SAC ralhraang pawl an tuar na ṭheu.

Curuangah ralhraang pawl cu a thup theibik in le mi ih rinhleh lo dingin zin phunphun an hawl ih an cangvai ṭheu a si.

Leave a Reply

Your email address will not be published. Required fields are marked *