Hnih suak za SAC Ralhraang Thu suah

SAC ralhraang cun rampumhuap mipi riangri misual ah puh in sualtuahtu ralhraang 600 luan kan kai zo tiah June 10 zaan ah an phuang.

Cumicu an hmanfung MWD Tv in June 10 zaan nazi 8 thuthang ah a suah ih meikhaangtu mipum 49, mithattu 61, Daan lo ih hriamhrei meithal kaitu 256 le puakkuainak tuahtu mipum 272 pawl an siih zatekom 638 an si tiah an phuang.

Cuihtlunah meithal fate 50, cerek phunphun dawng 2502, kuttuah meithal 914, lei phum bomb le kuttuah bomb 5947 pawl kaih cih an si tiah MWD Tv in a phuang ih, cumicu SAC ralhraang official website khalah an pholang.

SAC ralhraang thusuahmi ah kaih ngah mi pawl cu rampi ukhruaidan cingpeng dingin cangvaitu an si tiah an tarlang ih that tuar khuabawi 6 zuk khal an pholang cih.

Kan theih le hmuh cio bangin rampumhuap hmuntinkim ih sual phunphun tuahtu cu SAC ralhraang sawn an si tikah hivekih thu an suah cu mipi hrangah hnihsuakza a si.

Asinan, kan theih ding pakhat cu SAC ralhraang in hitiih thu a suah cu mipi thintok dingin le supaw thei loin leitlun mipi hmai ah luarkai zetih cangvainak nei dingin le CRPH, NUG, PDF le Mipi humtu ralkapbu dangdang hmu sual dingin ziin an sial mi khal a si thei.

Cumicu ramkhel į¹­henkhat le rampi boruak thlirtu į¹­henkhat ih zumnak khal a si ih, NUG Union Minister U Yee Mon khalin “hriamhrei ralthuam rinsan in sual phunphun tuahtu cu SAC ralhraang le an milai pawl an si. Rampumhuap hmuntinkim ih sual an tuah mi cu CRPH, NUG, PDF le mipi humtu ralkapbu dangdang hmusual dingin SAC ralhraang in lamziin a sial rero” ti`n a rak sim dah a si.

Assistance Association for Political Prisoners (Burma) ngan khum mi ah rampi a buai thok hnu February thla ihsin June thla tiangah SAC ralhraang kut tuar ih thi mipum 861 le kaih khih tuar 5985 an um zo ti a si.

Leave a Reply

Your email address will not be published. Required fields are marked *