Hlaing Tharyar myone ah kahthatmi 21 an luan ih Ruak 4 a Hlo

Kawl Ralkap ukhruainak sungih um Myanmar rampi ah a ninii in buainak a sosang vivo ih ralkap le palik pawl ih kah thatmi mithi khal a ninii in an pung vivo.

Kawl ralkap in February 1 zingih kumpi cozah thuneihnak a la hnu, buainak sosang zet ni nikhat cu March 14 a siih, hih ni ah hin minung 50 hnak ih tam an thi tiah nemhnget hrihlomi thuthang ṭhenkhat in an tarlang.

Abikin Yangon ramṭhen, Hlaing Tharyar myo ah buainak a sosang cuangih March 14 lawngah Siizung lam ih nemhngetmi mithi 21 hnakih mallo an um ti a si ih miruak 4 cu an hlo tiah BBC in a tarlang.

March 14 zinglamri ah အောင်ဇေယျ lilawn kiangin meithal kap puak awn a suak hmaisabik ih cuhnu cun sunvu deuh thaw thil puak awn a thang.

Mino rual in အောင်ဇေယျ lilawn kiangin ziin an kham thok ih mipi hrang ruat in le duhphorh ṭanlaknak hrangah ti`n thuahthum rorin ziin an kham.

Mino pawl cu ralkham, kuthruk, datkhu khamnak hmaikhuh pawl thawn duhphorhnak ṭhekdarh tumtu palik le ralkap pawl an rak bawh cia ṭhepṭhep.

Asinan palik le ralkap pawl cu an bawh nak lam i ra lo in an dunglam sawn in an rasuak ciamco. Cukhalcu duhphorhnak hrang hmun laili an khuarmi tansan in nazi 12 hrawng ih zingrawl an zawh laifang ah a siih cuih caan ciah ah ralkap mawṭaw cu a rualrual in an ra thleng cupco. Palik le ralkap dunglam zawng ih an lut mi le Mino pawl zingrawl an zawh lai ciah ih an thlen theinak hi mipi lakah ralkap lamṭang thlingthla thupetu um ding khi a bang.

Ralkap le palik pawl cun ziin khamnak pawl cu an ur kang ih mipi cu nasa takin an nuai ciamco. Numi le kum upa tamsawn cu dung ah sipter an siih turuh ralṭha minorual cu dung khal sip loin an ralkham thawn an rak do ve.

Hih hmun ah hin hliamhma tuar khal an tam ih mithi khal an um tiah mino lakih telve mipakhat in BBC hnen ah a sim.

Cutin, Hlaing Tharyar myone ahcun buainak a sosang ih China copany innpi ṭhenkhat khal a kang. Innkang thu ah hin miṭhen cun ralkap pawl ih urhrimmi a si tiah an sim ih mipi urmi sawn a si titu khal an um.

Cangvaihnak ih pumpeawtu mino pakhat cun “Zaan nazi 6-7 hrawngah 124 lam ah mipakhat a thi bet. Catbang loin meithal an kap ruangah a ruak ka lak thei lo. ယောမင်းကြီး ziin lam khalah mi 3 an thi. ချမ်းသာ ziin ah mipakhat a thi ih Hlaing Tharyar siizung ih nemhnget mi mithi 21 an um tiah kan thei. Asinan mithi cazin thawn kaihawlo in miruak 4 an kim lo. Cumi ah cycle kethum mawngtu ruak pakhat khal a hlo tel. A thi ti cu kan thei nan a ruak khal kan hmu lo ih a cycle khal a hlo” tiah BBC hnen ah a sim.

Zaan nazi 8 hrawng in Hlaing Tharyar myone ah Martial Law an phuang ih khawthim hnu khalah meithal puak awn a thang a si. (BBC)

Leave a Reply

Your email address will not be published. Required fields are marked *