Harhdamnak Zungpi in Myanmar rampi ralrinnak a pe

Tuvek ziin in Myanmar ram ah Covid 19 nat nei an pung vivo asile Mina tuamhlawm enkol hmalakdaan kan sambau ding tiah rampi Harhdamzung ih ṭuanvonei Dr. Myint Htwe in a sim.

Yangon ramṭhen Covid 19 dokham hmalak zung 14 ih ṭuanvonei pawl thawn video conference an nei nak ah a sim mi a siih, amah cun “Covid raldotu Dr, saya/ma le Volunteer pawl cun SuuZaan catbang loin deihaw ṭawkṭawk in hna an ṭuan ih, tuvek dinhmun in ramsung ah Covid 19 mina an pung vivo a si le kan neihsun Covid raldotu Dr, saya/ma le Volunteer pawl an deihaw nawn lo ding” a ti.

Curuangah cuvek dinhmun thlenglo dingcun rampi Harhdamnak le Lehpan zungpi ih thu suahmi Covid 19 boruak ih thlun dingmi Daan pawl cu mipi lam in thlun tengteng a ṭul thu khal a sim ih “Daan thlun ṭhiṭha lo in ramsung ah nat a karh vivo a si cun hihnak ih khoh mi thlun dingmi Daan suah bet a si ding” a ti.

Mipum zawng in, Myanmar rampi mipum million khat ah minung 41 cu Covid 19 natnak in an thi tiah rampi Harhdamnak le Lehpan zung in a phuang ih Covid 19 ruangih thihlohnak tong Leitlun ram 230 ah 129 nak kan si tiah an tarlang a si.

Kan ram Harhdamnak le Lehpannak zung in 2020 December 15 zan nazi 8:00 ih thu a than mi ah Covid-19 mina hmuhsuah zo mi zate’n 110,667 an si thlang. Hmuhsuah zo mi mina, 110,667 ah 2,319 an thi ih 89,418 an dam sal a si.

Leave a Reply

Your email address will not be published. Required fields are marked *