Gangaw peng ih rapthlakza kahdonak

Magway ramṭhen, Gangaw peng, Minta khua ih kahawknak ah khuami le mipi humhimtu telin amalbik mi 15 an thi tiah theih a si.

Mizaan, September 9 ih thil thleng a si ih kahdonak a suak hlei ah SAC ralhraang pawl in inn 10 lenglo an urkang tiah khuami pawl in an rel.

“Zinglam nazi 10 hrawng ah ralhraang pawl in meithaltum thawn kan khua an kap ciamco. Mipi humhimtu mino rual khalin tingaihnak thei lo in Lai meithal thawn an kap ve. Asinan hriamhrei ralthuam thlauawtuk ti cu kan mino pawl an thi deuh thaw thluh” tiah khuami pakhat in a rel ih “kan mino pawl cu khua kiltu an si. PDF phungpha deuh khi an si” a ti.

Khuami pakhat khalin “Tuṭum hi Minta khua ih kahdonak a suak hmasabik ṭum a si. Dalan pawl in PDF an um tiah zual an ko ih ralhraang pawl khuasung ah an luh pi.”

“Atakcun khua humhimnak hrang ṭuanvo latu mino ṭhenkhat lawng an um. Kum 19-20 hlir an si ih that tuar mi lakah ka naupa khal a tel. Miruak cu khuasung le khualeng ah ti`n ruak 11 hrawng a um. Tuizing September 10 tiang khua inn pawl a kang rero lai ruangah miruak pawl cu kan sar ngam hrih lo. A kir ngamtu khal an um hrih lo” tiah hmunhim ih beutu Minta khuami mipakhat cun BBC hnen ah a sim.

Tuini, September 10 tiang khuasung ah SAC ralhraang pawl umhmun an khuar lai ruangah kum upa le midamlo siar lo khua ah an um ngam lo. Kiangkap khuami ṭhenkhat khal thinphang in hramlak ih beunak hawltu an um.

Cuihtlunah ralkian khuami pawl cu Lo an thlo lai ah meithal thawmvang an thei ruangah timlamnak zianghman nei man lo in hramlak ah an beu ruangah harsatnak tumzet an tong tiah theih a si.

Hih thu thawn pehpar in SAC ralhraang lam khalin thusuahnak an nei ih “Khua haal dingin rakap pawl an feh ih khuami 50 lenglo in meithal thawn an rak kap. Curuangah kahdonak a suak mi a si ih kan lam ah mipakhat a thi. Khatlam ah cu miruak telin meithal 30 hrawng kan lak ngah” tiah SAC ralhraang lam in thusuahnak an nei ve.

Asinan khuami pawl cun SAC ralhraang thusuah cu thuphan men a si tiah an rel a si.

Leave a Reply

Your email address will not be published. Required fields are marked *