Filmmaker Ma Ein cu SAC ralhraang in a Kezung ruh an khiak sak thluh

Kawlram mihminthang Filmmaker Ma Ein cu SAC ralhraang kaih a tuar hnu, an hrem nakah a Kezung ruh zaten an khiak sak thuh.

Cumicu thuhla felfai theitu mipakhat in Irrawaddy hnen ah a sim mi a si ih “an kai hnu, thuhla sut in an hrem ih a Kezung ruh an khiak sak thluh. Culodang an hremnak hriamhma thawn ralhraang siizung ah ni 10 hrawng an ret. Tucu a ṭha zo ih kiah tuar pawl ret nak hmun ah an khum sal” a ti.

Anih hi June 5 ah Yangon ih a umnak inn ihsin a suak lai fang ih kiah tuar a si ih an kai nak thla 1 a kim zik thlang nan tuni tiang an kaih nak san a sungte in an thei hrih lo.

Ma Ein rualṭha mipakhat khalin tubaite Thawnginn ihsin thlahzalenmi mipakhat hnen ih a thu theih cu a relsuak sal ih “a nih a ra suak ahcun Ma Ein a dam cak zet zo a ti. Nan, zarhkhat hrawng a rei zo. Tudinhmun ah Ma Ein umnak hmun kan thei lo ih kan seherh zet. Ra suak thei zang dingin beiseinak kan nei” a ti.

SAC ralhraang in February 1 ih kumpi cozah thuneihnak an la hnu, tuini tiangah an kut tuar ih thi mi 883 an um ih kaihkhihmi mipum 6399 an nei. Cumi ah mipum 1966 an thlah zalen zo tiah theih a si.

Leave a Reply

Your email address will not be published. Required fields are marked *