Federal Democracy hrang Lamsial dingin CRPH in thukamnak a nei

Kawl ralkap in Myanmar rampi ukhruai thuneihnak a la hnu, NLD palai pawl ih dinsuahmi CRPH (Committee Representing Pyidaungsu Hluttaw) cun ralkap ukhruainak (Military Dictatorship) hnukthlak dingin tlangparmi pawl thawn kutzakai tlangin hna a ṭuan thok tum thu theihternak thukam capi an suah.

Capi ahcun Myanmar rampi tungding sal dingih kekarnak an nei tum mi pawl tarlang a si ih tlangparmi pawl ih beisei zetmi 2008 Daanhrampi ṭhiatbal ding le Federal Democracy hrang Daanhrampi tuah sal ding khal a tel cih.

Committee Representing Pyidaungsu Hluttaw in Facebook cahmai ih official theihternak ca a tarlang mi ah ….

1. Myanmar rampi le tlangpar mipi cu ralkap ukhruainak hnuai ah kum tamzet kan rak um zo. Ralkap pawl in hriamhrei ralthuam rinsan in kumpi cozah thuneihnak an la mi khal voi tamzet hmuzotu kan si. Ralkap cozah ih haamṭamnak, a diklo zawngin thuneihnak an hmangmi siseh, rampi duhdawtnak neilo ih an cangvaihnak pawl cun leitlunhuap san man lo ram pakhat ah in can.

2. Ralkap pawl cun duh caan ih rampi thuneihnak la thei dingin 2008 Daanhrampi an tuah. Asilo zawng khalih hman theihmi cuih Daanhrampi ih a hum hai mi lawng duhtawk loin kan mai` nganmi Daanhrampi cu an pahbal ih 2021, February 1 ah kumpi cozah thuneihnak an lak.

3. Ralkap pawl in mai duhdan ih cangvaihnak an nei mi le tlangpar mi par ih thilsual an tuahmi hmuahhmuah cangsuak tertheitu cu 2008 Daanhrampi hi a si.

4. Committee Representing Pyidaungsu Hluttaw cun ralkap ukhruainak tawpter thei dingin le Federal Democracy hrang ziin sial dingin a tanglam i tarlang mi tumtahnak kan nei.

(1) Ralkap ukhruainak tawp terding.
(2) U Win Myint le Daw Aung San Suu Kyi telin kaihkhih tuar hmuahhmuah luat terding.
(3) Democracy ngah thei nak ding.
(4) 2008 Daanhrampi ṭhiatbal in Federal Democracy hrambunmi Daanhrampi tuahsuak ding.

5. CRPH tumtahmi cangsuak thei dingin tlangparmi pawl thawn kutzakai tlangin hnaṭuan tlang dingin hmalaknak kan nei vivo ding tiah thukamnak kan nei a si” ti`n CRPH cun official in theihternak capi an suah.

Leave a Reply

Your email address will not be published. Required fields are marked *