Falam telin rampi huap Election Commission ṭuanvonei mitamzet kaihkhih tuar

2020 hrilawknak ih rampi huap Election Commission ṭuanvonei mitamzet cu February 10 ah ralkap thupeknak thawn palik in an kai thok tiah theih a si.

Falam telin Chin ramkulh pengṭhen huap sub-Election Commission ṭuanvonei pawl khal kaihkhihmi ah an tel thu theih a si ih February 10 zaanṭim lai ah innkhat hnu innkhat luhhnawh in palik in an kai tiah theih a si.

Kaihkhih tuar mitamsawn cu thusutding mallai a um ti`n palik in an pan ih a zaanzaan rorin palik zung ah an hruai cih a si.

Tuhrihtiang cu kaihkhih an tuar nak san theihfiang a si lo nan 2020 rampi hrilawknak ih rampi/pengkulh huap Election Commission an ṭuannak thawn pehtlaihnak a um ding tiah zumnak a um.

2020 rampi hrilawknak ah vote diklo a um timi phuahlam thawn rampi cozah thuneihnak latu Myanmar ralkap cun 2020 rampi hrilawknak ih vote diklo thuthawn pehpar in hmalaknak kan nei leh ding tiih a rak phuang cia mi cu tui`zaan February 10 ihsin a cangvai thok a si ding tiah zumnak a um a si.

Leave a Reply

Your email address will not be published. Required fields are marked *