Facebook in Ralkap Cozah Thar A Hrem

2020 Mynamar rampi hrilawknak thawn pehparmi thuthang diklo hlonfairerotu Facebook cun Kawlram ralkap ta a simi Myawaddy television network thawn pehparmi Facebook cahmai pakhat cu tlawngkai nikhatzaan ah a platform in a hlonhlozo thu a phuang a si.

Facebook hin kum 2018 khalah Ralkap thawn pehparnak a nei mi Myawaddy television network cu ramsung buainak karhtersin theitu dinhmun in a rak phit sak zo.

Cucu, ramsung Rohingya pawl ciimittum thubuai luar sintertu a hrambik cu Facebook ih cathlahmi in a thok timi, U.N. human rights ṭuanvonei pawl in an hmusuak ruangah Facebook in hmalaknak a nei mi a si ih, cuih ṭum ah Myawaddy television network le Min Aung Hlaing FB telin ralkap thawn pehparnak a nei mi FB page 20 lenglo cu Facebook in a phit sak.

Tuṭum, Myawaddy TV network phitsak a simi thuthawn pehpar in Facebook public policy for Southeast Asia director Rafael Frankel cun “Mynamar ram hrang ah emergency dinhmun in cangvainak kan nei mi a si ih buainak luartersin theitu tiih ruah mi zuk,video,ca post le rampi thuneihnak laktu ralkap faknak, lungkimpinak tvk ca hmuahhmuah khal cangtheitawkin kan hlawn thluh a si” a ti.

Cuihtlun ah Facebook hin Mynamar ramsung ih thuthang diklo a suak tharmi siseh, rampi hrilawknak ah diklonak a um tizawng ih huukraaktu auaw siseh a thlir ringring thu khal a sim cih ih thuthang diklo le buainak suaktertheitu hmuahhmuah cu a ṭuldan ih zirin kan hlon vivo ding a ti.

Myanmar ralkap in February 1 zinglam ah tolai cozah thuneihnak a cuh ih ramsung ukawkdan tamzet a thleng cih a si. Ramkulh pengṭhen uktu pawl khal a thleng thluh deuh thaw ih Myanmar rampi cu a kutsung ah a huumreektum a si.

Leave a Reply

Your email address will not be published. Required fields are marked *