Fa le kaihsak phang ah Indra Kyaw Zin te nupa in Ralkap kaihkhih an tuar

Kawlram lemcangthiam hminthang Indra Kyaw Zin le Pyay Ti Oo te nupa cu April 9 ah kaihkhih an si thu MWD TV in a phuang.

An nih nupa hi April thlathok lam ah kawlram hminthang milangsar tamzet ralkap in kaih ding ca an suah mi lakih telve an siih SAC ralkap lam cun pukmah 505 orhter in an kai tum mi a si.

SAC ralkap in Myanmar kumpi cozah thuneihnak an la hnu ah Indra Kyaw Zin te nupa hi ralkap ukhruai dodaltu lakah langsar zetih telmi an si.

Curuangah an hmin thannak le hamṭhatnak an nei mi hmangin ralkap ukhruainak dodal dingah mipi lung an tho ter sin ding an phan ruangah tuvekin kaihkhih an tong hi a si.

Tuhlan ihsin hmun him ah relh ih khawsa an si nan ralkap lam in kan kut ih nan ap aw lo a si cun nan fa le kan kidnap ding tiah an hringhro ruangah tuvekin ralkap kut ah an ap aw mi a si tiah an naivai ih um ṭheu pawl hnen in thuthang a suak.

An nupa in kaihkhih an si thu cu thuthang diklo a si tiah thulengvak a um nan, neta ahcun ramsung media rintlak ṭhenkhat in kaihkhih an tuar taktak a si tiah nemhngetnak an run nei leh mi a si.

Indra Kyaw Zin te nupa hi fa 2 nei zo an si ih ralkap kaihkhih an si lai ah an fa le an tel maw tello ti le ralkap in khawi hmun ah an hruai tvk khal thuthla felfai a suak hrih lo.

Leave a Reply

Your email address will not be published. Required fields are marked *