Duhphorhnak neitu Kum 19 Nute cu Cerek ngai thawn an kap ngah

Ralkap uknak duhlotu Myanmar mipi tamsawn cun rampi huap hmuntinkim ah duhphorhnak an nei ih February 9 ah Nay Pyi Taw ih mipi duhphorhtu pawl cu palik in cerek ngai thawn an kap ruangah kaptuar mipakhat a besia tiah theih a si.

Amah cu kum 19 mi Ma Mya Thet Thet a si tiah ramsung media pawl in an tarlang ih an kap ngah lai video khal online ah a darh thluh a si.

Video ahcun mawṭaw thawn tidai an zit ciamco lai a lang ih bus stand vek innte dungih ding, angki sen hruk nunau pakhat cu tidai zit ban lonak lam a feh tum ih meithal puak awn a thang veten lei ah a tlu cih. A tluk veten a cang nawn lo.

Ralkap in Myanmar ram cozah thuneihnak a la hnu ni 9 sungah Ma Mya Thet Thet hi palik kut tuar in besia zetih Siizung thlenghmaisabik a si. Duhphorhnak ah palik in tidai zit ruangih hliamhma tuar khal an um ih rubber cerek hliamhma tuar khal an um .

Ma Mya Thet Thet siatton thu ah ralkap cozah lam in ziangtin hmalaknak a nei tum ti cu theih a si lo nan hih thil thleng hin mipi lung a ti puak kuai ih ralkap cozah doduhnak lungput a suak ter sinsin a si.

Leave a Reply

Your email address will not be published. Required fields are marked *