Doawknak ah ralthuam ṭha nei cing in Ralhraang ralkap tuar na sawn

Tufang hi Kayin ramkulh, Myawaddy peng ah ralhraang ralkap le mipi ralkap ṭangkop pawl nasaten an doawk laifang a si ih, kaphnih in mithi le hriam tuar an um veve.

Myawaddy thawn peng 18 hrawng hlat nak ih um ralhraang ralkap sakhaan “Ukayit” cu KNLA, KNDO le mipi ralkap pawl ṭangkop in an lak tum ih June 26 zingpit ihsin an doawk thok zo.

KNDO thawn naivaitu mipakhat in “mizaan doawknak ah KNU hnuai ihsin ralkap 2 an thi ih hriam tuar 4 an um. Thuhla cipciar an suah hrih lo nan raldonak hmun ih um tu pawl cun ralhraang rakap 20 tal an thi ding zum a um ti`n in sim.”

“Tu ni khalah boruak dai lam a pan lo. A caan le hmainortu pawl kan pehtlaih thei lo. Ralthuamtum puak awn khal a thang. Ruahpi le a sur. Nan, timlam tumtahmi neih cia vekin hmai nor hrih a si ding” tiah a ti.

Ukayit ralhraang sakhaan hi hmun rem zet ih um a si ih KNU ralkap thawn an doawk tikah ralkap pungkhawm hmainornak ah siseh, ralthuamtum kap nak ah an hmang ṭangkai zet mi hmunram a si ih, atu ah mipi ralkap pawl in cuih hmun lak tumin ralhraang ralkap an do rero laifang a si.

Doawknak ah ralhraang ralkap in raldonak Jet 3 an hmang hlei ah BGF ralkap pawl bawmnak an dil bet. Cuti cingin Thailand lam ih tlanpiṭul thuamhnaw pangai hruk ralhraang ralkap hriam tuar hmuh ding an tam.

Kawlram a buai hnu, KNU hmunram pawl ah ralhraang ralkap le mipi ralkap pawl an doaw rero zo ih, kan dung June 13 khalah Ukayit thawn peng 3 hrawng hlat nak ih um WawLay ralhraang sakhaan cu KNDO le mipi ralkap ṭangkop pawl in an lak sak zo.

Cuih ṭum ah ralhraang ralkap 3 an thi ih nungdamin palik 5 an kai. Cuhleiah PDF ralkap 9 pawl an runsuak cih a si.

Leave a Reply

Your email address will not be published. Required fields are marked *