Doawknak a um hran lo nan Vansang ihsin Sagaing ramṭhen Khuate 2 an kap ciamco

Sagaing ramṭhen, Taze peng, Gadik le Inn khua cu Ralhraang SAC ralkap in Helicopter 2 thawn an kap ciamco.

April 21, zaanlam nazi 3 hrawngah Gadik le Inn khua kiangkap cu doawknak zianghman um hran loin SAC ralhraang in Mi-35p helicopter 2 thawn an kap ciamco hlei ah thil phur nakih hmanmi Mi-17p helicopter thawn khua kiangkap ah ralkap an ṭhum ti a si.

Khawmi pakhat cun “emergency dinhmun a si. Khua zawn bat hrim in raldonak helicopter thawn an kap ciamco. Tu khalah an kap lai. Cun, helicopter thawn ralkap voi 3 rori an ṭhum zo” a ti.

Taze PDF ralkap pakhat khalin helicopter thawn an kap ruangah Khuami tamzet in khua an suahsan tiah a rel ih “boruak a sosang lai ruangah thuhla felfai kan thei hrih lo. Khuami a rualrual in inn le Lo an suah san” a ti.

Tudinhmun ah Gadik le Inn khua kiangkap cu raldonak helicopter thawn an kap ciamco hlei ah ralhraang ralkap thazaang 60 hrawng an ṭhum zo ti`n ramsung media in a tarlang a si.

Leave a Reply

Your email address will not be published. Required fields are marked *