Demawso doawknak ah SAC ralhraang in Raldo vanzam hmang thok

Kayah ramkulh, Demawso peng ah tuini December 31, zinglam nazi 10 hrawngin SAC ralhraang le hriamkai ṭangrual pawl an kapaw ih zaanlam tiang boruak a sosang zet.

Kayah hrambun media ṭhenkhat cun ralhraanglam an tuar na ruangah raldo vanzam tivek tiang an hmang thei ti`n sun hrawng ihsin ralrinpekawknak thu an suah ih, SAC ralhraang cun zaanlam nazi 3 luan ah raldo vanzam 3 a hmang ngaingai.

SAC Ralhraang in raldo vanzam thawn bomb an thlakmi cu Demawso – PDF khalin a tarlang zo ih, bomb an thlak lai video tawi khal online ah a darh.

“Dawngankha khawziinpial ah bomb an thlak ih vanzam par khalin an kap. Vanzam 2 hnakih mallo an hmang. Khawpisung khalah meithal puak thawm a thang” tiah PDF ralkap pakhat cun a rel.

Doawknak ah SAC ralhraang a tuarna bangin hriamkai ṭangrual pawl lam khalah khawngaw le hriamtuar an um ih, atu dinhmun khalah an doaw rerolai tiah theih a si.

Leave a Reply

Your email address will not be published. Required fields are marked *