Covid 19 Ral Do dingin Than Shwe san ih Dr. hminthang cangvai thok

Covid 19 suar hnihnak in Myanmar rampi a nuai ih a ninii in nathrik a karhzai roh vivo ruangah dokham danding ngaihtuah dingin tuhlan cozah san ih rampi Minister Of Health Lubik rak ṭuan dahtu Dr pahnih cu hnaṭuan dingin an ra kir sal.

Ministry of Health and Sports hnaṭuan bawm dingih ra kir sal cu Dr Pe Thet Khin le Dr Kyaw Myint an si ih Covid 19 thawn pehpar mi medical advisory group thawn thureltlangnak an nei tiah, Ministry of Health and Sports cun September 23 ah a phuang.

Thuphuan ahcun Dr Kyaw Myint cu Covid 19 thawn pehpar mi Technical Assistance Advisory group ih hotu dinhmun ah a tel ti a siih Dr Pe Thet Khin cun Health Impacts Advisory Committee ah Chair dinhmun in a kaihruai ti`n an ngan.

Dr. Pe Thet Khin cu 2011 ihsin 2014 kum tiang rampi Minister of Health Lubik rak ṭuan dahtu a siih University of Medicine (Mandalay) le University of Medicine (1), Yangon khal ah Professor rak ṭuan dahtu a si.

Dr. Kyaw Myint cu Than Shwe san lai ah Minister of Health Lubik a rak ṭuan ih Than Shwe tei` innsang specialist Dr khal a si.

Dr. Pe Thet Khin hoha mi Advisory group cu 2020 April 22 ih dinsuahmi a siih Dr. Kyaw Myint hoha mi Advisory group cu 2020 September 20 ih dinsuahmi a si tiah Myanmar now cun a ngan.

Tudinhmun, Myanmar ramsung ah Covid 19 mina 7,827 hmuhsuahzo a siih cumi ah minung 133 thi in, mipum 2085 an dam sal a si.

Leave a Reply

Your email address will not be published. Required fields are marked *