CNN palai ih vehvainak veng pawl cu Thinphang Thlaphang in an um

Ralkap hraang le palik pawl in CNN thawn interview nak neitu mipahnih an kai ruangah CNN palai Clarissa Ward ih vehvainak veng pawl cu thinphang thlaphang in an um tiah theih a si.

Yangon, Pyay lamziin, မိုင်ကုန်း bazaar ih thilzuar mipakhat cun “CNN thuthang latu pawl thawn interview nak neitu mipahnih cu ralkap hraang pawl in tuizing ah an kai. Curuangah interview an nei mi midang pawl khal an thinphang ih hmunhim hawl in an tlan hlo. Hih veng ih um mipi pawl khal, zaan ah ralkap pawl ih buai hnawh ding an phang zet” a ti.

မိုင်ကုန်း bazaar ih CNN pawl thleng man hlan ah ralkap pawl an thleng hmai ih mipi ṭhih hrim vekin sukso ah an vak an tawi, khua an cuan awter ciamco tikhalin amah cun a sim hrih.

CNN palai pawl bazaar ih an thlen ahcun mipi lam in darkheng bungbel an vuak awn ciamco ih kiangkap ih motor pawl khal “horn” an tum ciam co.

Clarissa Ward ih interview tuahmi mi 5 an um ih, cumi ah bazaar hmai ih Asia Light dawr neitu nu le a hnaṭuantu mipakhat an kai tiah a hmutu pawl in an sim.

Iraq, Syria, Yemen, Afghanistan ralram khalah nunnak thaap in Thuthang la ding in a pok ṭheu …….

Clarissa Ward cu CNN chief international correspondent a si ih Iraq, Syria, Yemen, Afghanistan ralram pawl ah nunnak thaap in thuthang la ṭheutu a si ih hmuhtonmi tamzet neizotu a si.

Ralram ih thuthang la ngam Journalist tamsawn cu an nun tluan ah thinlung tham zettu hngilh theihlo hmuhtonmi thil danglam an nei ruangih nunnak thaap in hnaṭuan an si.

Cuvek ṭhiamṭhiam in Clarissa Ward khal hi tuhlan kum 20 luanzo ih a hmuh tonmi ruangah ralram ah thuthang latu dinhmun in hna a ṭuan thokmi a si.

Cabu a suah mi ahcun “Ralhraang pawl in kum 2001 ih World Trade Center an pah ṭum kha, ka rualnu inn ah TV thawn live in ka zoh. Ka mit hmuh rori ah zingtik hman ah a siat thei dah lo ding ka ti mi World Trade Center innpi cu a cim ruairo. Ka ruahnak le ka lungthin a puak kuai ih “ka kiangkap ih thil thleng pawl hi ngaihven man loin caan reituk ka rak hmang liam zo a si hi. Tu ahcun ka tuah ṭul mi ka thei zo” ti`n thuthluhnak ka nei” a ti.

Leave a Reply

Your email address will not be published. Required fields are marked *