Chinram telin rampumhuap hmun ṭhenkhat ah Bomb a puak ih Mithi khal an um

April 29 zingthlapit ah Chinram telin rampumhuap khua ṭhenkkhat ah bomb a puak thu theih a si.

Zinglam nazi 4 luan hrawngah Chinram khuapi Hakha ah bomb voili a puak tiah khuami pawl in an sim.

“SAC ralkap milai Pu Ngun San Aung inn kiang telin hmun 4 ah a puak. Zinglam nazi 4 in 5 karlak ah a si ih Economic bank kiang, Cozah Zungpi kiang le Hakha khuathar pawl ah a puak” tiah khuami mipakhat in a sim.

Bomb puaknak kiangkap ih um pawl cun kan inn tiang a tlir thluh thei tiah an sim ih bomb puahtu cu an thei lo. Innleng retmi thilri siat ṭhenkhat cu a um nan mithi le hliamhma tuar cu an um lo tiah theih a si.

Magwe le Meiktila ah bomb puak

Zinglam nazi 3 hrawng ah Magwe myo, SAC ralkap Air base (လေတပ်စခန်း) in bomb puak thawm voi3 a thang tiah khuami pawl in an sim.

Ralkap Air base cu khuasung thawn peng 3 hlat hrawng ih ummi a si ih bomb puak cun khuasung lam tiang a tlir ban.

“Rocket thawn kap an tuar tiah thuthang a suak ih ralkap 6 thi in 10 lenglo hliam an tuar tiah kan thei. Bomb puak hnu reilote ah khua lutsak nakah ralkap an duty cih. Air base kiangkap khua le Magwe khuasung khalah ralkap cangvaimi hmuh ding a um” tiah khuami pakhat in Myanmar Now hnen ah a sim.

Meiktila Air base khalah zinglam nazi 5 hrawng ah bomb a puak tiah khuami pawl in an sim Rocket bomb thawn kap an tuar tiah thuthang a suak.

Air base kiang ih um Khuami pakhat cun “zinglam nazi 5 hrawng ah voi 5 an kap puak zo. Innleng, khualeng suaklo dingin khuauk zung lam in thu an suah. Kan umnak kiangkap tiang bomb puak thil perh a tla ban. Ṭih a nung zet. Tutiang cu mithi le hliam tuar tivek an um lo hmang” tiah Myanmar Now hnen ah a sim.

Meiktila khuasung ih လဝက zung khalah April 29 zinglam ah bomb an puah tiah theih a si ih khuami pakhat cun “လဝက zung ih rangva khal a hlipaw thluh. Air base lam khal siseh khuasung khalah cawp le cilh in bomb puak awn a thang. Zoi puah mi a si ti cu kan thei lo” a ti.

“Yangon, Hlaingthayar No. 16 ih khuabawi zung khalah April 29 zing ah bomb a puak ih mipakhat hliam tuar tiah BBC in a ngan”

Zuk : CJ

Leave a Reply

Your email address will not be published. Required fields are marked *