Chindwin Tipi par ah SAC ralkap le PDF nasaten an Kapaw

May 6, zinglam nazi 9 hrawngah Chindwin tipi par ah SAC ralkap le mipi humtu ralkapbu PDF an kapaw tiah theih a si.

Chindwin tipi par ih SAC ralkap ralthuam phurtu tiih ruah mi CeetLawng pakhat cu zinglam nazi 9 hrawngah Ketaung khua kiang in mipi humtu ralkapbu in an rak kap thok.

Cuih CeetLawng cu nasaten an kap hnu ah feh thei nawnlo dingin an siat sak ta tiah kiangkap khuami pawl in an sim.

Culaiah Monywa lam ih hung kai so SAC ralkap CeetLawng fate pawl cu nisuahnak lam tivaral in khuami in an rak kap ve ih ralkap pawl cu kai so thei loin Monywa lam ah an kir sal tiah khuami pakhat in BBC hnen ah a sim.

Chindwin tipi par ih SAC ralkap rak dotu cu May 5 ih dinsuahmi People Defence Force thawn kopaw Sagaing People Defence Force an si tiah BBC in a tarlang nan SPDF le PDF center lam cun tuhrihtiangah thuthang an suah hrih lo.

Sagaing People Defence Force hi NUG in May 5 ih mipi humtuding People Defence Force ralkapbu a din hnu, zaanlam ah Sagaing ramṭhen Myone 37 rak humtu ralkapbu thawn pehtlaihaw ih dinsuah tharmi a si.

Sagaing People Defence Force dinsuah a si thu tarlangmi ah ပြောက်ကျားစနစ် in SAC ralkap do dingin le CDM tuahtu cozah hnaṭuan humtuding ah kan dinsuah mi a si tiah an tarlang.

Sagaing People Defence Force dinsuah a si hnu, a nikhatnak May 6 ah SAC ralkap kahdonak an thok cih ih Chindwin tipi par ih doawknak hi NUG in PDF ralkapbu a din hnu, SAC ralkap thawn an kapaw hmaisabiknak a si.

Chindwin tipi par ih SAC ralkap CeetLawng an kap lai ah Lawng totu ralkap ṭhenkhat cu tipi ah dawp in an tlan hlo tiah khuami pawl in an sim.

Khuami pakhat cun “CeetLawng par kan va zoh cu meithal cu kan hmu lo. Nan, Gunpowder cu kan hmu” a ti.

Zaanlam nazi 3 hrawngah PDF kut sungih umzomi ralkap CeetLawng la sal dingin SAC ralkap CeetLawng 2 an kai so nan tidai a puantuk ruangah Lawng pakhat cu a tang.

Khuami pakhat cun “tuvek tikcucaan cu tidai a mal ih tipi umdan theithiamlo cun tipi lailak ah tang pang a ol te” a ti.

Tipar ih CeetLawng a tang lai ah SAC ralkap ṭhenkhat cu tikap ah an kaiso in ṭanhmun an khuar. Culaiah ralkap 30 hrawng telmi miburkhat cu khuami pawl in nisuahnak tipiral lam in an kap thok. Ralkap lam khalin meithal thawn an kap ve.

SAC ralkap pawl Tikap ah an kaiso

“Kan lam ah hliamhma tuar kan um lo. Ruahsur lai fang a si tikah PDF lam khal an meithal a pauk ciang theilo ih duh vekin an cangvai theilo” tiah khuammi pakhat cun a ti.

Tawkmawi an kapaw hnu ah meithal ralthuam hmanmi a thlauawtuk ruangah PDF lam dung an siip sal.

Culai ah Tipi ih Lawng tangmi ralkap ṭhenkhat cu tikap ah ṭum in PDF pawl in tomi Lawng lam an neih vivo. Meithal thawn khal nasaten an kap.

Khua a thim ih nitlaknak lam tipikap ah SAC ralkap umhmun an khuar ruangah kiangkap khuami zate deuh thaw cu thinphang in Inn le Lo an suah san ih hmunhim beunak hawl in an tlan thluh.

Chindwin tipi ih hmaisabik PDF kahdonak ah ralkap lam ta meithal ralthuam tamzet ngah ding an beisei nan ruahpi a sur nasatuk ruangah PDF pawl ih meithal a puak theilo ih duh vekin an cangvai theilo ruangah an hlawhsam.

Nan, CeetLawng an la ngahmi sungih Gunpowder pawl cu tipi sungah tamzet an hlawn ngah. Cumicu khuami pawl ih zuk ngahmi sungah fiang zetin a lang mi a si.

An boruak a sosang zetih SAC ralkap bawmtuding tlunlam Chindwin, Kalay lam ih ralkap tamzet khal an cah betih Monywa lam khalin ralkap bawmtuding dang pawl an thleng bet.

Chindwin kap ih um khua ṭhenkhat le hmun tamzet ah SAC ralkap umhmun an khuar tiah khuami pawl in an sim.

May 6, Chindwin tipar doawknak ah SAC ralkap 4 an thi tiah theih a si nan ralkap lam cun thuthang zianghman an suah lo. (BBC)

Leave a Reply

Your email address will not be published. Required fields are marked *