CDM ih telve Siizung hnaṭuan mipum 100 luan cu Mipi in ralṭha zetin an runsuak

Shan : Taunggyi Myo, စဝ်စံထွန်း siizung ih hnaṭuan CDM ih telve minung 100 luan cu palik in an kulh thluh nan bungbel darkheng an tum ciamco ruangah mipi in an va run man ih kaihkhihmi zohman um lo ten an kir thluh sal.

CDM ih telvetu စဝ်စံထွန်း siizung ih doctor, nurse le ward servant minung 150 hrawng umnak cu February 15 Zaanlam nazi 3 hrawngah palik in an kulh thluh.

“Palik tamzet an ra an ti ih ka va zoh cu thawngtlak mawṭaw le palik mawṭaw 10 hrawng ka hmu. Minung 20-30 hrawng an si ding. Meithal khal an keng” tiah CDM ih telve doctor pakhat in Myanmar now hnen ah a sim.

Palik pawl cun sangka an king ciamco ih inn sung um pawl khalin mipi bawm dilin bungbel darkheng an tum ciamco. Thawmvang a suak veten miburpi in zohman kaihkhihmi umlo dingin palik pawl cu an kulh ve.

Mipi lak ih telvetu mipakhat cun “Mibur ṭhek dingin kahpuah an kap ih buai celcel lai ah cycle pah ngah ruangah nunau pakhat in hliam a tuar. Siizung hnaṭuan minung 5 hrawng cu palik mawṭaw ah an khum zo. Nan, mipi in nan thlah hlan lo lamziin kan lo kham ding kan ti ruangah an thlah sal” tiah DVB hnen ah a sim.

Siizung ih hnaṭuan mipakhat khalin “Thaisun in siizung an ong sal ding tiah thuthang a suak. Siizung Uk in hnaṭuan pawl hmin a khen ter. Ziangruangah ti cu kan thei lo. Kan sut ahcu thaizing in hnaṭuan thok sal ding an tum ruangah hmin kan khen termi a si a ti. Asinan, Siizung ih hnaṭuan pawl cun CDM pehzom an tum thotho. Zohman zung kai an tum lo” a ti.

Siizung ih hnaṭuan pawl bawm dingih fehtu mibur cu ṭhekdarh thluh tum in palik in kahpuah voili an kap nan mipi an lungrual ruangah CDM teltu Siizung ih hnaṭuan pawl cu kaihkhih umloten an him thluh a si. (DVB, Myanmar Now)

Leave a Reply

Your email address will not be published. Required fields are marked *