CDM ih telduhlo Saya/sayama pawl ruangah Mi 1 thi, 6 in hliam tuar

Sagaing ramṭhen, Panlaybu myo ih duhphorhnak ah ralkap le palik pawl in mipakhat an kap that ih mi 6 hrawng in hliam an tuar.

April 5 zinglam nazi 11 hrawngah Katha District, Panlaybu myo ih CDM lutlotu tlawng saya/sayama training kainak ih duhphorhtu mipi cu ralkap pawl in ṭhekdarh in meithal an kap puak ruangah mipakhat a thi.

“Tuizing Myoma thlawng ih training kai tlawng saya/sayama pawl cu mipi in lenglam in duhphorh hnawhnak an nei ih culai fangah meithal an hmet puak. An buainak hi siizung le palik sakhaan thawn a hlat tuk lo. Hliam tuar pawl cu siizung ah an hnuk cih. Hliam tuar besia Mandalay lam ih kuat ṭul khal an um” tiah khuasung um mipakhat in a sim.

Duhphorhnak ah a ṭang ih an kap ngah mi mipa pakhat a thi ih hliam tuar dang 6 cu Panlaybu siizungpi ah an kuat. Hliam tuar 6 lakah mipahnih an besia ruangah Mandalay lam ah kuat dingin timlamnak an nei rero.

Ralkap le palik pawl in duhphorhnak ih mipi an ṭhekdarh lai ah mi pahnih kaihkhih an si ih an pahnih in thawngtlak motor thawn Katha lam ah an hruai tiah BBC in a ngan.

Kawl ralkap pawl in ramsung Internet pehtlaihawknak an phit ruangah ပင်လယ်ဘူးမြို့ ih buainak hi lenglam mi in an thei tuklo tiah khuami pawl in an sim.

Leave a Reply

Your email address will not be published. Required fields are marked *