Bungbel darkheng tal ruangah Bazaar phit sak

Ralhraang ti ciimit dingih thukam tuahnak theihpiin darkeng bungbel an tal ciamco ruangah Magway, Myoma bazaar ih dawr to pawl cu ralhraang ralkap in thil zuar an khap.

July 31, zinglam nazi 10 luan hrawngah ralhraang ralkap duh lo nak langtertu mipi pawl thapekin Magway, Myoma bazaar ih to pawl in buangbel darkheng an tal.

Cuih thu ah a tuahtu pawl relsuak dingin palik le siipin pawl in thu an sut nan, thuhla zianghman an rel lo ruangah hremnak pekin thilzuar an khap tiah tualsungum mipakhat cun a rel.

“Magway Myoma dawr tiih koh mi bazaar tlar ih thil zuar pawl in bungbel darkheng an tal ruangah caan khiah um loin thil zuar an khap.”

“Siipin, palik le ralkap pawl an ra ih zo in a tal hmasabik ti`n thu an sut nan zohman in an rel duh lo. Nan rel lo le thil zuar kan lo khap ding an ti nan zohman in an rel duh cuang lo. Curuangah a tu hi bazaar to an khap” tiah a ti.

Mipakhat khalin “Zo in a tal hmasabik ti a um thei lo. Zinglam ah bazaartluan thukam tuahnak ah an zaten darkheng talin duhphorhnak an tuah. Cuhnu ah mawṭaw thawn ralhraang ralkap le siipin pawl an ra ih zirzoinak an tuah. Asinan, zohman an ṭong duh lo ruangah caan khiah um loin bazaar an phit sak” tiah amahcun a ti.

Leave a Reply

Your email address will not be published. Required fields are marked *