Tlangpar hriamkaibu 2 karlak boruak sosang, Ziangtiklai khalah kap aw thei dinhmun an si

SAC ralhraang kut hnuai ih um BGF (ကရင်နယ်ခြားစောင့်) le KNU karlak boruak a sosang ih KNLA tatmaha 5 (KNU) cun BGF hnen ah netabik ralrinpeknak an nei a si.

BGF thawn pehparmi le ralrinpeknak thusuah cu January 12 ah KNLA tatmaha 5 in ciang zetin an suah fel a si.

Hih thu thawn pehparin KNLA ṭuanvonei ralbawi SawKaLay cun “Mipi pianvo ziangah siar loin duh tawk ih mipi soisatu SAC ralhraang thawn hna an ṭuan tlangmi cu ngaithiam thei lo cin a thleng thlang a si. Curuangah ralhraang hrang hna ṭuan nawn lo dingin netabik ralrinpeknak kan nei.”

“Kayin ciocio mah le mah doawk kan duh lo nan, tuvekin SAC ralhraang thawn hna an ṭuan tlang thotho cun hrial theih lomi kahdonak a suak ding. Ralrinpeknak ziang siar loih an um cun kan ramsung ih kan hmuh nak piang ah kan kap thlang ding” tiah a ti.

BGF hin SAC ralhraang hrang hna a ṭuan sak lawng siloin LayKaykaw doawk ṭum khalah ralhraang thawn ṭangtlangin PDF le hriamkai ṭangrual pawl an rak do ve. December 16 ih ralhraang ralkap mi 8 an kai mi lak khalah BGF ralkap 2 an telve tiah theih a si.

Tuhlan ah BGF le KNU karlak buainak a um tinten doawk hrialin thurel remnak an nei ṭheu nan, tuṭum thu cu tuini tiang zianghman reltlangnak an nei hrih lo tiah kan thei.

Leave a Reply

Your email address will not be published. Required fields are marked *