Bago Myo ih minung 100 luan an that ṭum Mit rori`h hmutu Mino pakhat Annka

Bago raltlan Ko Kyaw cun SAC ralkap in April 9 ih Bago myo an siim ṭum a hmuhtonmi hmuahhmuah a relsuak thluh sal ih ralkap cetcangdan a sim sal mi cu a rapthlak um tuk lawmlam.

Bago myo cu April 9 zingthlapit in zaan khuathim tiang SAC ralkap le palik in meithal phunphun thawn an nuai ih nikhat sung lawng ah mithi 100 an luan tiah Bago raltlan mino Ko Kyaw cun a ti.

Amah cun “Ralkap le palik kut tuar ih thi cu mipum 82 an ti. Asinan, atak ahcun 100 an luan. That tuar lakih thinnat umbik pakhat cu motor cycle thawn hliamhma tuar mipakhat an hnuk that mi hi a si.”

“Meithal hliam tuar ti thei cingin a kut dunglet in an ṭawn ih khuasung heelpi in motor cycle thawn an hnuk vivo. Ataksa a ṭet ṭheh ih a thih tiang rori khuasung an heelpi. Cumicu April 9 ih thil thleng a si. A sungte pawl in a ruak an va hlam cu a hmel khal ṭhiṭha in a lang thei nawn lo. Motor cycle thawn an hnuk nakah a taksa a ṭolh thluh ih zoh ṭhiṭha ngam ding khal a si lo” a ti.

SAC ralkap le palik cun zingthlapit in mipi` ralkhambuuk an siim ih meithal phunphun thawn an kap. RPG le kutken bomb khal an hmang ih mipi lakih thidok nungdok hliamhma tuar pawl cu phungki tlawng ah a peng in an peng.

“Phungki tlawng ih hliamhma tuar pawl cu electric wire hri thawn duhsah in an thawi bet. Phungki pakhat in zoh thei nawn loin a va tuamhlawm tumnak meithal thawn an tin ih ‘himihi nan nih phungki pawl ih hnaṭuan a si lo. Voikhat na rat bet cun kan lo kap that ding’ tiah an hringhro ih hliamhma tuar pawl cu sii pek khal an siang lo” a ti.

Ko Kyaw cu a mit hmuh rori ah a rual le pawl an thi cuupcomi tuar thei loin hmundang ah raldodaan zir dingin tlansuak a si ih mipi hlirtlinmi cozah in ramuknak la thei sal dingin SAC ralkap do tum lakih telve pakhat a si.

April 9, Bago myo ih doawknak thuthawn pehpar in Ko Kyaw cun “မဂတစ် veng ih ralkham buuk ah mithi an tam bik. Kan umnak lam cu RPG le bomb dang an hmang tuk lo. မဂတစ် lam cu RPG le bomb dangdang voi 18 hrawng an kap. Curuangah mithi an tam ih khuavang hnu nazi 8 hrawng ahcun ralkham buuk tansan in dung an siip. Ralthuam hmanmi a thlauaw tikah dungsiip rori a ṭul si ko”.

“ဆံတော်တွင်းံတပ် ahcu zing lam ah mipakhat a thi. Culai ah မဂတစ်ခံတပ် cu mipum 50 luan an thi zo. Cutin, SAC ralkap le palik kut tuar ih thi an pung vivo. Ralkham buuk an ṭhiat thluh hnu khalah vengsung innkhat hnu innkhat lutsuak in mi an hawl ih an hmulo cun innsung ih um hmuahhmuah an thawi ciamco ih a kai cih bet. Aṭhen cu an that cih ih hliamhma tuar ṭhenkhat cu phungki tlawng ah an ret. Cun phungki tlawng sung in mi an bawh ih lamziin ih vaksukso an hmumi hmuahhmuah cu an kap thluh. A thi lo pawl cu phungki tlawng ah an hnuk cih” a ti.

SAC ralkap le palik in April 7 ih Bago myo an siim lai ah bat cuangmi hmun 5 an nei. Cuih hmun cu meithal ralthum phunphun hmang in nasaten an nuai ih zing khuavang hlan in zaan thim hnu tiang ah SAC ralkap le palik kut tuar ih thi mipum 100 an luan tiah Ko Kyaw cun a ti. (VOA)

**Hmin lem hman a si…

Leave a Reply

Your email address will not be published. Required fields are marked *