Bago ih ralkap le palik kapaw nakah ralbawi pakhat thi

Min Aung Hlaing hohami ralkap in kumpi cozah thuneihnak an la hnu, ramsung ah buainakin a khat ih ralkap ukhruainak hnuai ah Myanmar rampi a derthawng.

Mipi lam in thei tawk suahin le nunnak rori thaap in ralkap ukhruainak an dodal ih mipi ṭhangphoknak thawngin lungfiam sal palik le ralkap khal hmuh ding an um phahphah.

Cuihtlunah SAC ukhruainak hnuai ih hnaṭuan ralkap le palik karlak khalah buainak a um phahphah ih mah le mah kapaw ruangih nunnak liam khal hnih-thum an um.

Mizaan, April 29 khalah Bago ih ralkap le palik kapaw nakah motor cangsual in ralbawi pakhat a thi tiah theih a si.

Zaan nazi 11 hrawng ih thilthleng a si ih Bago khualaili rori ah motor thawn dawiaw phah in ralkap le palik an kapaw ih motor cangsual betin hliamhma tuar ralbawi pakhat a thi.

Khuami pakhat cun “ralbawi pakhat a thi tiah thuthang kan dong ih meithal kaptu palik khal an kai zo. Kan zum dan ahcun uniform hruk loin duty nakin thilthleng siding kan zum. Cun zu khal an ri a bang” a ti.

Zaan nazi 11 hrawng ah ralbawi le palikbawi an kapaw ih သနပ်ပင် ziintluan ah motor thawn dawiaw phah in an kapaw vivo. Khuasung nazii innpi kiang an thlen ah ralbawi tomi motor cun ziinkhamnak a pah ngah ih, cutin cangsual in a thi a si tiah Bago hrambun BDN in a ngan.

Asinan, ralkap lam cun kapawknak thuhla le ralbawi thi thu cu thuthang ah an phaung lo.

Leave a Reply

Your email address will not be published. Required fields are marked *