Atufang Myanmar Rampi Dinhmun

Kawlram ralkappi cun rampi thuneihnak ka lak tumlo a ti hnu a nihnihnak, February 1 zing ah rinlopin rampi thuneihnak cu a lak ta riar.

2020 rampi hrilawknak i vote diklo a um a timi puhmawh in rampi thuneihnak a lak ih Myanmar ram president U Win Myint, rampi thuron Daw Aung San Suu Kyi le rampi huap NLD hruaitu pawl cu a kai thluh hai.

Ramsung online pehtlaihawknak tamsawn a phit ih Yangon Airport a phit tlun ah khuasung ziinpi ṭhenkhat phitin ralkap/palik pawl a kilter ṭhepṭhep.

Yangon ih BBC le CNN tv line pawl khal a phit thluh ih anmai network a simi MWD Digital TV Myanmar lawng ong theih dingin a tuah ih, cuih line lawngin rampi sungih thuthan a duh mi tlangaunak a nei.

Ralkap lam cun “2020 Myanmar rampi hrilawknak ah vote diklo million teelin a um. UEC lam in simfiahnak an nei tumlo. Rampi thuneihnak cu mipi duhhrilnak vekin cangsuak dingmi a si. Asinan 2020 hrilawknak ah diklonak tamzet a um ih a diklo zawngin fehpi a si ruangah mipi duhhrilnak dokalhphung in a feh. Mipi lam in rampi hruaitu an duhlonak langer cingin cozahpi in hmalaknak a nei tumlo ruangah ramsung remdaihnak um dingin thuneihnak kan lakmi a si” tiah an tarlang.

Ralkap in rampi President a kilkhawi ruangah VP 1 U Myint Swe cu lailak President ah khaiso a si lawk nan U Myint Swe cun 2008 daanhrampi khihhmuh in rampi thuneihnak cu ralkap kut ah a pek sal mi a si.

Ralkap in Myanmar rampi thuneihnak a lak mi thuthawn pehpar in Leitlun huap ram tamzetin nasaten an sawisel a si.

Ralkap lam cun 2008 Daan hrampi khihhmuh in kum 1 sung rampi kan kilkhawi lawk ding tiah thu an suah ih 2020 rampi hrilawknak result an pom theilo thu le a thar in hrilawknak tuah an tum sal thu an tarlang a si.

Leave a Reply

Your email address will not be published. Required fields are marked *

error: hahahahahaha !!