ASEAN thusuahmi ah Mi thiam sang pawl ih hmuh dan

Asia nisuahnak thlanglam ram 10 kom ih dinsuahmi ASEAN pawlkom cun Myanmar thubuai relin April 24, Indonesia, Jakarta ah meeting an nei.

Myanmar ramsung remdaihnak hrang thurelkhawmnak an nei hnu ah ASEAN cun thusuahmi 5 a nei. Cumicu …..

1. Ramsung ih a hraang zawng cangvaihnak titawp thluh dingin le rampumhuap pawlkom zaten theitawp suah ih supaw ding

2. Mizapi hrang remdaihnak um thei dingin khat le khat thurel tlangnak nei ding

3. ASEAN palai bomnak thawn Myanmar aiawh ASEAN palai in hmuhton thurel tlangnak hrang Lam sial ding

4. ASEAN hmalaknak thawn ramsung bomnak tawlrel ding

5. Myanmar ramsung ah ASEAN palai lut in party pawlkom hruaitu zaten tong khawm ding… tipawl an si.

ASEAN hruaitu pawl cun meeting thusuah 5 cu diriam umzet tiah an porhawk nan thusuahnak an nei hnu reilote ah soisel nakin a thlun cih hai.

Human rights activist hminthang Aung Myo Myint cun “Ramsung ih a hraang zawng cangvaihnak titawp dingin le rampumhuap pawlkom zaten theitawp suah in supaw ding tiih an ngan mi number pakhat nakin a dik lo zo.”

“Zopawlsaw a hraang zawng ih cangvaitu? Zo saw mi kai mi hrem le mi that hmang? Soisa dekcawk tuartu cu mipi hi kan si. Mipi lamlam a hraang zawng ih cangvailoding an ti cu a san um lo” a ti.

February 1 ih kumpi cozah thuneihnak an la hnu ah SAC ralkap in minung 750 an kap that zo ih mipum 3000 luan an kai zo. Cuih thuthawn pehparin ASEAN thusuahmi ah thawngtlak thlah zalen ding timi a tel lo.

Aung Myo Myint cun “thusuahmi pahnihnak khal thil awmanglo thotho a si. Buainak thawn pehpartu zaten khat le khat thureltlangnak nei ding an ti. Cutin an ti nan thawngtla pawl thlah zalen dingin thu an suah cuanglo tikah an thusuahmi cu san neilo ah a cang” a ti.

3,4,5 nak ah “ASEAN palai bomnak thawn Myanmar aiawh ASEAN palai in hmuhton thurel tlangnak hrang Lam sial ding, ASEAN hmalaknak thawn ramsung bomnak tawlrel ding, Myanmar ramsung ah ASEAN palai lut in party pawlkom hruaitu zaten tong khawm ding” tiah ASEAN cun thusuahnak an nei bet nan atakin ziangtikah hmalaknak an nei thok ding ti an ngan tel lo.

Aung Myo Myint cun “SAC cu phuahlam phunphun hawlin khulfung zetin a cangvai thei. Ziangtiktiang a rei ding? zo pawl in kan thih sak bet ding? Vun ruat cun a rapthlak tuk” a ti.

NLD hluttaw palai Ma Kyi Pia khalin ASEAN thusuahmi thu ah “ka rak beisei sang ngam lo cia hrimhrim” a ti.

April 24, Indonesia, Jakarta ih tuahmi ASEAN meeting ahcun Myanmar aiawh in ralbawi Min Aung Hlaing a laang in a va tel ih ASEAN thusuahmi į¹­henkhat cu a lungkimpi tiah Mizzima in an ngan.

Leave a Reply

Your email address will not be published. Required fields are marked *