ASEAN meeting ih ralbawi Min Aung Hlaing an sawm nak san

Myanmar thu thawn pehpar in atufang leitlun ramkhel thiamsang pawl ih thlirbikmi pakhat cu ASEAN meeting ah Myanmar ralbawi Min Aung Hlaing an sawm ve mi hi a si.

ASEAN meeting ih Min Aung Hlaing tel ding thu cu Myanmar mipi` cozah dik tiih ruahmi NUG – National Unity Government an dinsuah hnu a nikhatnak April 17 ah Thailand Ministry of Foreign Affairs zung in a phuangsuak ih Myanmar mipi` cozah dik NUG um cingin ralbawi Min Aung Hlaing lamlam ASEAN meeting ih an sawm cu Myanmar ram hnen pawl in an lungput dik an langter mi a si tiah ramkhel thiamsang pawl in an sim.

A ruh lang ding ko ih kan simfing ding a si le ASEAN meeting ih Min Aung Hlaing an sawm cu Myanmar telin kan ram hnen 10 kom khawm ih dinsuahmi ASEAN pawlkom hin Min Aung Hlaing hohami SAC hi Myanmar cozah dik ah a pom sawn tinak a si. Cumicu ramkhel thiamsang ṭhenkhat ih hmuh dan a si ih The 88 Generation Peace and Open Society (၈၈မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း) khalin Min Aung Hlaing meeting an sawm thu ah ASEAN nasaten a sawisel ih ralrinnak khal a pe cih.

The 88 Generation Peace and Open Society (၈၈မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း) cun an mai` Facebook Official cahmai ah hitin an tarlang.

“ASEAN pawlkom cu mai hrang cang-ai khorh lungput neitu an si ih an pawlkom sungtel ramsung ih buainak a um tikah hlawhtling ko hmalaknak an nei thei dah lo/an tum lo. Cumicu zahthlak mualphonak tumzet a si. Cun, Myanmar rampi Dothlennak hrang kum 30 sung a talbuai lai ah ralkap lam ah ṭang sawn in thuanthu mawilozet neitu a si.”

“Atu khalah mipi` hriltlinmi cozah kaireek tahratin duhtawk ih mipi sawisa rerotu ralkap sawn cu mithmai a pe zetin a lang.”

“Curuangah ASEAN meeting ih ralkap an sawm mi cu nasaten kan soisel ih SAC ralkap pawl in Myanmar mipi an that bet vivo a si le an mah lawng siloin ASEAN khalin mawh a phur timi kan phuang duh” tiah an tarlang.

Leitlun ramkhel thiamsang ṭhenkhat khalin ASEAN meeting ih Min Aung Hlaing an sawm nak san cu Myanmar ralkap ukhruainak san lai ih Myanmar ramsung ah duhtawk ih an rak cangvai thei vekin a tu khalah beiseinak an nei sal ruangah a si tiah an sim.

ASEAN sungtel ram pawl lawng siloin kan ramhnen India khal hin an ram ham ṭhat nak ding a si cun ziangvek thil thleng khal pawi an ti lo. India cozah Luban pakhat cun “Democracy maw kan ram hlawknakding timi ah kan ram hlawknakding hi number 1 ih kan ret sawn mi a si” tiah a rak rel dah.

ASEAN meeting cu April 24, Indonesia, Jakarta ih tuah dingmi a si ih meeting ah Myanmar ram buainak thuhla an rel ding. Hih meeting ah Myanmar cozah hruaitu dinhmun ih sawm a si mi ralbawi Min Aung Hlaing cu a mah rori a feh ding tiah thuthang a suak lawk nan Online Video hmuhtonnak sawn in a tel sal tum tiah ramsung media ṭhenkhat in an tarlang.

Leave a Reply

Your email address will not be published. Required fields are marked *