ASEAN meeting feh ding thu ah Thuthup puut suak

Myanmar rampi aiawh dingin Indonesia ih ASEAN meeting ah sawm a si mi Min Aung Hlaing cu amah rori feh in a tel ding tiah thuthang a suak lawk ih neta hnu ah online in a tel ding tiah thuthang a suak sal.

Anmah ralkap lam cun official in thuphuangnak an nei lo ih mizaan tiang ih thuthang suak dan ahcun online sawn in tel ding vekin ruah a si.

Nan, tuah rintlak thuthang pakhat cun amah Min Aung Hlaing rori ASEAN meeting ah a feh ding zum a um thu a tarlang.

Thu umdan cu, April 24 ih ASEAN meeting tuahnakding Indonesia, Jakarta ih feh dingmi Myanmar Airways International vanzam totuding hmin cazin cu rintlak Freelance Journalist Mratt Kyaw Thu in a ngah suak.

Cumi ah Myanmar Airways International ih Deputy Chief Executive Officer khal April 24 ih Jakarta lam zam dingmi vanzam ah a tel ve ding ti thuhla felfai theisuah a si.

Myanmar Airways International ih ṭuanvosang nei pawl hi khuatlawng pangai ah an tel dah lo. Thuhla poimawh pipa um caan lawngih cangvai ṭheu an si ih ASEAN meeting tuahnakding Jakarta lam pan in April 24 ih an poksuak tum cu Min Aung Hlaing an phur tum siding tiah zumnak a um.

Cuhleiah cuih vanzam ahcun khualtlawng pangai ih tel dah lo Chief Cabin Crew 2, Leading Cabin Crew 2, Cabin Crew dang 3 le hnaṭuantu dang zatekom minung 18 an tel ding tiah theih a si.

Airline ṭuanvosang nei telin vanzam ih ṭuanvonei 13 le reserve 5 telin Vanzam ih hnaṭuan tuding minung 18 rori voikhat ih buatsaih tlang cu Airline hnaṭuan dan pangai a si lo. Mithupi cozah Luban khualtlawng ding caan ih Airline timlamdan a si hlei ah April 24 ih ASEAN meeting tuahnakding Indonesia, Jakarta pan tum a si tikah Min Aung Hlaing an phur tum siding tiah ruahnak a um.

Cun, Nikkei Asia khalin ASEAN meeting ah Min Aung Hlaing amah rori a va tel sal ding tiah a ngan a si.

Leave a Reply

Your email address will not be published. Required fields are marked *