April 9, Bago myo Doawknak ah Mithi 62 an um + Video um sun

Bago myo cu SAC ralkap le palik pawl in April 9 zingthlapit in zaan khuathim tiang an nuai ih tuhrih tiangah mithi 62 an um zo tiah ramsung media ṭhenkhat in an tarlang.

Mipi lam in မဂ္ဂတစ် lamziin ih ralkham buuk an tuah mi cu rinloparal ah ralkap le palik pawl in an siim ih bomb le meithal phunphun thawn an nuai ciamco ruangah zingthlapit ah minung 10 hrawng an thi cih ih kiangkap ih um Inn le Lo tlansan in himnak hawl ih tlantu khal an tam tiah hruaitu pakhat in a sim.

Amah cun “zingpit ah rinlopin an rualrual in an ra suak ciamco ruangah mipi lam khal thinphang in Inn le Lo an tlan san ih himnak hawl in an vak an tawi. In ra kaptu pawl cu ralkap/palik za luan an si ding” a ti.

SAC Ralkap le palik pawl in veng sung ah meithal phunphun thawn an kap ciamco ruangah အလင်းရောင်, အင်းဝင်, ဆိုရှယ်လစ်, မှော်ကန် le ပုဏ္ဏားစု veng ih um mipi tamzet cu Inn le Lo tlansan in himnak hawl in an tlan tiah Bego ih um mipakhat in a sim.

SAC ralkap pawl cun zing nazi 4 hrawngin bomb le meithal phunphun thawn vengsung an kap ciamco ruangah veng ṭhenkhat cu zo hman khalin an neih ngam lo ti a siih mipi lam ih hruaitu pakhat cun “mithi 20-30-40 maw an um tikhal kan thei lo. Nan, a fiang mi cu mithi tamtuk an um ti hi a si. Ramsung kahawknak ah Bego in kap mi hi a nasabik ding” a ti.

Mithi 62 le hliamhma tuar pawl cu ဆိုရှယ်လစ် lamziin ih tlawnginn le biakinn pakhat ah hmun 2 in an peng ih zaan nazi 7 hrawng ah SAC ralkap pawl in an umnak tatmah 77 ah an thiar leh ti`n Bego ih um mipakhat in a sim ih zaan thim hnu nazi 9 kim zik tiang khalah meithal puak theih ding a um rero a ti.

Zingpit ahcun Bego myo sung hmun 5 bat bikin meithal an kap puak ih zaanlam hnu, ralkap phurtu motor 10 hrawng a thleng bet hnu ah veng dang sung pawl khal ah lut vivo in an hmuhhmuh mi an kap hluahhlo tiah khuasung um pawl in an sim.

“Zaan thim hnu ah veng ṭhenkhat ahcun meisa an ti mit ih ralkap vak sukso khal hmuh ding an um. Atu khal ah biakinn pakhat ah ralkap pawl umhmun an khuar ih hliamhma tuar mipi an kai phah rero” tiah khuasung ih um mipakhat in a sim.

Tuisun, April 9 ih Bego myo kahawknak ah nemhnget hrih lomi thuthang ṭhenkhat cun minung 50 hnakih mal lo mithi an um tiah an tarlang ih mipi lam in an do let nakah ralkap lam thi le hliamhma tuar khal an um tiah theih a si.

(Myanmar Now, VOM)

Leave a Reply

Your email address will not be published. Required fields are marked *