April 8 : Kalaymyo khuasung boruak – Video

April 7 ah SAC ralkap pawl in minung 12 rori an kap that nan Kalaymyo mipi pawl cun April 8 ah lamzawh duhphorhnak an nei thotho tiah theih a si.

“Thih cu kan ṭih ko. Asinan, ralkap ukhruainak tang ah zingvek dinhmun kan si ding ti kan thei ciang ruangah le ram le miphun hrang nunnak pezotu upat pek nakah lamzawh duhphorhnak kan nei mi a si.”

“Cun, zalennak caan malte kan rak tepzomi le Federal Democracy hrambunmi rampi dinsuak a si ding timi hin kan thinlung a luah khat. Curuangah ram le miphun hrang hmainor duhnak lungthin in mi a tur tikah dung siip kan tum lomi a si” tiah Tahan ih mino pakhat in a rel.

Kawl ralkap pawl in February 1 ih kumpi cozah thuneihnak an la hnu ah Kalaymyo mipi pawl in ni 61nk lamzawh duhphorhnak an nei zo.

Cumi ah ralkap le palik pawl ih hnaihnoknak a cangcang ah a um ih March 28 ahcun meithal le bomb tiang hmangin lamzawh duhphorhtu pawl cu SAC ralkap le palik pawl in an ṭhen ṭhek.

Cuih ni ah miralṭha 5 nunnak liam a si ih ralkap lam khalah mithi le hliamhma tuar an um ve.

Mipi` ralkap le SAC ralkap an kah aw thok, March 28 hnu cun Kalaymyo seh vel ah nitinten kahawknak a um ringring ih Inn le Lo tansan in beunak hawl tu mipi khal an tam.

Cutin’ nitinten doawk a si hnu, April 7 ahcun SAC ralkap pawl in mipi kilhimtu Kalay Civil Army pawl ih umnak hmun cu zingpit ah bomb le meithal phunphun in an kap ciamco.

Mipi (KCA) lam khalin hriamhrei neihsun hmangin an hum aw nan meithal ralthuam hmanmi thlau aw tuk cu mipi lam ah mithi 12 an um ih hliam tuar 30 luan an um. Cuih tlun ah SAC ralkap pawl cun ralthuam hriamhrei telin Kalay Civil Army 18 an kai tiah theih a si.

April 8 Kalay boruak Video …

Leave a Reply

Your email address will not be published. Required fields are marked *