April 4 zaanlam ih Tamu kahawknak UPDATE!

April thla thok in Ṭamu mipi le kawl ralkap pawl cu nitin deuh thaw an kapaw ih April 4 khalah nazi 6 sung hrawng an kapaw tiah theih a si.

Zaanlam nazi 3 hrawng ah kawl ralkap pawl cun mipi pawl ih sak mi buuk (bunkers) an kap ciamco ih mipi lam khalin humaw in an kap let ve.

Mipi lam in an do let leh ruangah kawl ralkap pawl cu dung an siip ih, cufangah mipi lam in ralkap motor ah kutken bomb an deng ih a puak fuh ruangah ralkap 4 an thi tiah a hmutu pawl in an sim.

Tamu ih um mipakhat cun “an ra lai fang ah ralkap motor sungah kutken bomb an deng. Cuveten, kawl ralkap pawl cun an hmumi pohpoh an kap thluh. Mipi lam khal hliam tuar an um” a ti.

Kawl Ralkap 4 thi thu cu Tamu ih um thufelfai theitu pawl in DVB hnen ah an nemhnget ih ralkap lam cun mithi um zat le hliam tuar ziangzet an um tivek khal media ah an tarlang lo.

April 4 zaanlam nazi 3 hrawngin an kapaw thok ih nazi 6 hrawng an rei tiah khuami pawl in an sim. Mithi um zat le hliam tuar thu cu theih fiang a si hrih lo.

Tamu ah hin April 2 zaan khalah mipi le ralkap/palik an kapaw ih, cuih doawknak ah palik 5 an thi. Mipi lam khalah CDM teltu palik pakhat cu an kahawknak hmun ah a thi. (DVB, MG)

Leave a Reply

Your email address will not be published. Required fields are marked *