April 10, Tamu doawknak ah mipakhat thi, an kapaw pehzom ding zum a um

April 10, sunlai nazi 12 hrawngah Sagaing ramṭhen, Tamu khua ih ralkham buuk pawl cu SAC ralkap le palik in nasaten an kap ciamco tiah theih a si.

Culai ah hmunhim hawl ih tlan motor cycle to mipakhat cu ralkap pawl in an kap that tiah a hmutu pawl in an sim ih mithi dang khal um thei dinhmun a si tiah an sim.

“Zinglam nazi 11 hrawngin SAC ralkap le Tamu mino pawl an kapaw thok. Cumi ah motorcycle to mipakhat cu ralkap pawl in an kap that. Ralkap lam khal hliam tuar le mithi an um” tiah kapaw nakah ka telve tiawtu mipakhat in Tamu Facebook group ah a ngan.

Tufang ahcun ralkap lam dung an siip ih naga biakinn kiangah umhmun an khuar. Cuvek dinhmun a si ruangah kapawknak a um peh ding zum a um tikhalin a ngan tel.

April thla thok in Ṭamu mipi le kawl ralkap pawl cu nitin deuh thaw an kapaw ih April 4 khalah nazi 6 sung hrawng an kapaw.

Cuih ni ah mipi lam in ralkap motor sungah kutken bomb an deng puak ih ralkap 4 an thi. Mipi lam khalah hliamhma tuar an um tiah thufelfai theih a si ih mithi an um le umlo cu theihcian a si lo.

Tamu hi ralkap le palik in an tin cuangnak cu April 2 zaan ih kut ken bomb thawn palik zung an deng puak ruangah a si tiah khuasung dinhmun cuantu pawl in an sim.

Cuih zaan ah CDM luttu Chin paralṭha palik pakhat in kut den bomb 3 keng in miburkhat a hoha ih palik zung an siim nakah mi 5 an that. Palik zung do nakih hohatu Chinpa khal cu palik zung kiangte ah an kap that tiah theih a si.

April 10, tuisun Tamu kahawknak ah hin mipi lam in mithi/hliamhma tuar ziangzet an um ti le palik/ralkap lam teh thihlo an um maw timi theihfel a si hrih lo.

Leave a Reply

Your email address will not be published. Required fields are marked *