AA le SAC ralhraang karlak boruak sosang, ziangtiklai khalah kap aw thei

Tuhlan ihsin doawknak a suak rero zonak Rakhine ram ah atharin SAC ralhraang le AA ralkap karlak boruak a sosang sal ih ziangtiklai khalah kap aw thei dinhmun ah an um.

Tuvek dinhmun a thlen nak san cu ralhraang ralkap in AA ram ah a ralkap thazaang tampi hmun dangdang ah a kuat ciamco ruangah le AA ukhruainak an hnaihnok ruangah a si ti`n hmintarlang lomi sunglamthu theitu mipakhat in a rel.

“AA ukhruainak hnuai ih hnaṭuan ṭhenkhat an kai tum. Mipi an hringhro ih phunhnam zawngin ramsung buainak suakter theimi hmalaknak an nei tam vivo. AA ralkap ziangah siar loin nan ram ah duhduh in kan um thei tivek phun in an cangvai. Cumiruang bikah boruak a so sang sal” tiah amahcun a ti.

AA le Kawl ralkap cu tuhlan ah nasa takin an rak doaw dah ih kahdocolh lungkimnak an tuah hnu khalah buainak a dai thei taktak lo.

Atu ah, atharin boruak a sosang sal ruangah AA ralkap cun Rakhine mipi ralrin a pe ih doawknak a suak thei ringring ruangah ralkap cangvaihnak kiangkap siseh, umhmun khuarnak le an sakhaan kiangkap feh hrial dingin May 15 ah thuthannak an nei.

Abikin Maungdaw le Buthidaung kiangkap ah ralhraang SAC ralkap hmuh ding an tam ih, tubaite khalah helicopter thawn ei-inding le ralthuam ṭhenkhat an ṭhum ti`n tualsungum thuthang pawl in an tarlang a si.

Leave a Reply

Your email address will not be published. Required fields are marked *