AA in Ralhraangbawi Min Aung Hlaing a kop duh lo nak san Thudik

Kan dungbai, ramsung remdaihnak thurel dingin ralhraangbawi Min Aung Hlaing sawmnak AA in a cohlang lo hlei ah NUG thawn khawtlang mipi theih in online ah thureltlangnak an nei.

Rakhine ralkap AA hi kan ram a buai pek ah mipi ralkap pawl raldo zirhmi cu an nei nan Dothlengnak ah langhngan rorin an hrolhaw tuklo.

Ramsung hriamkai thacaklam an si thawn ralhraang ralkap lam ṭangin an cangvai ding a phangtu an tam. Mahte ukawknak ngah duh an si ih zalennak hmin hmangin ralhraang sawmnak an cohlang pei maw tiah mipi in an thlir lai ah kan dungbai ih ralhraang sawmnak cu dothlengnak thapetu diriam zet dingin an el fukfi.

Cutiih thuthluknak an tuah nak san cu ralhraang ralkap thukam an zum thei lo ruangah a si ih, AA spokesman Khaing Thu Kha in June 14 online Press conference ah fiang zetin a rel.

AA spokesman Khaing Thu Kha

“Dothlengnak ah kan tel nak san cu rampi tungding beisei ah a si ih ram hrang hnaṭuan nakah rualpi kan nei tam deuhdeuh le a ṭha sinsin. Curuangah, tuhrih ahcun zalennak hrang raldotu pawlkom zaten siseh, NUG le PDF telin ṭangkop rualṭha vekin kan pehtlaih hrih.”

“Cun, SAC cu a ṭongmi le atakih a tuahmi a bangaw lo. Curuangah remdaihnak hrang thurel sawmnak khal kan cohlang lo mi a si” tiah AA spokesman Khaing Thu Kha cun a rel.

Cuhleiah miṭhen in dothlengnak thapetu pawl hnemawknak men a si tiih an rel ṭheu mi, ralhraang ralkaptlan an um mi thu khal Khaing Thu Kha in a rel cih.

Kan rampi a buai hnu, SAC ralkap tam zet Rakhine ralkap an kop ti`n thuthang a suak nak a rei zo nan miṭhen cun thulengvak le dothlengnak thapetu pawl hnemawknak men a si an ti.

Nan, tuni June 14 ah AA spokesman Khaing Thu Kha cun thutak a si thu, online Press conference ah a nemhnget ih SAC ralkap za teel in in ra pan zo a ti.

Asinan mipum um zat cekci cu a rel duh lo ih “thei tawk suahin bawmnak tawlrel sak mi le umhmunpek kilkhawimi an um” a ti.

Leave a Reply

Your email address will not be published. Required fields are marked *