A pa telin sungkhat naivai 10 rori that sak tuar Sagaing Tlangval Annka

May 12 ah Ralhraang 200 lengloin Sagaing ramṭhen, MonTaingPin khua an suah san hnu ah kum 20 luanfang Ko Thurein in ni 2 sung a hmu lo mi a pa le puzon telin a sungkhat naivai mi 10 pawl a hmu sal.

Nan nungdamin a hmu hai lo. An zaten an thi thluh. May 10-11 ah Ye-U peng khawte pawl luhcilhtu ralhraang ralkap kut tuar khawmi 19 pawl thawn an ruak a um khat. A ṭhen cu an ruak vutcam lawng a tang.

Hmunhim ah beu lawktu khawmi pawl in khawsung innkaang lakah ruak 29 an hmu. Khua hnar ah mipi ralkap ruak 2 khal an hmu. Cute pahnih cu ralhraang donakding bomb an tuah lai ah a puak pang ih a hmun ah an thi ti`n khawmi pawl in an sim.

Ralhraang kut tuar a pa, kum 50, U Aung Htoo le a sungkhat naivai mithi 9 thu ruat sal in “sankhukdaih tiang ralhraang ralkap cu ka dorallian an si ti`n ka pom” tiah Ko Thurein cun a ti.

Ralhraang ralkap hin MonTaingPin khua cu May 10 ah an luhcilh ih khawsung lut phah ah meithal nasaten an hmet puak.

“Ralhraang ralkap pawl khua lam an ra ti kan thei veten khua kan suahsan” tiah Ko Thurein cun a ti.

Nan, nunau telin kum upalam khawmi 100 hrawng cu kan him pang ah ti`n phungkitlawng ah an tang ih, cupawl cu ralhraang ralkap in an kai.

“Kum 60 tang mipa pawl cu that dingin an hril. Dungletin kut an ṭawn. Nunau ṭhenkhat le kum 60 luan upa ṭhenkhat cu an thlah sal. Kum 60 tang mipa zate cu PDF pawl bawm theitu an si ti`n an that thluh” tiah thlah sal mi khawmi pawl thurel sirhsanin Ko Thurein in a rel.

Khawmi 29 pawl cu mi bur tete ah ṭhen bet in a dangdangten an that thluh. Ralhraang ralkap cun May 11 ah khua an suah san ih inn 12 hnak ih mal lo an urkaang tiah Ko Thurein cun a rel bet hrih.

Sagaing ramṭhen, MonTaingPin ih ralhraang ralkap mithahnak rapthlak cu June 18 ah Radio Free Asia in a pholang.

Rapthlakza video le zuk phunphun telmi ralhraang ralkap phone thlau mi an sar

Ralhraang ralkap thlaumi phone sung ta zuk rapthlak le video tawi cu internet cahmai ah thlah darh a si ih phungkitlawng ih kutdunglet ṭawn kum upa pawl an zuk mi siseh, mawh nei lo khawmi an that mi miruak kiang ih an zukawmi pawl khal an pholang tel cih.

Cuhleiah phone neitu in mi a that zat le a thah dan pawl a rel lai video tawi khal leitlun mipi hmai ah pholang thluh a si ih ralhraang ralkap nunrongzia cu atakin leitlun mipi in an thei thluh a si.

Uangaw zetin mi an that dan an rel laifang (English subtitle)

Leave a Reply

Your email address will not be published. Required fields are marked *