A ninii in Ralkap le Palik cetcangdan a rapthlak um sinsin

2021 Dothlennak ih SAC ralkap le palik cetcangdan cu a ninii in a rapthlak um sinsin ih an kut tuar ih thi khal an pung sinsin.

Dothlennak ih mipi an kap that hmaisabik cu kumpi cozah thuneihnak an la hnu ni 9nk ah a si ih cuih ni ah kum 20 mi မြသွဲ့သွဲ့ခိုင် an kap ruangah ni reilo te ah a thi.

Culai ahcun lamzawh duhphorhnak neitu mipi cu hlan ih an hman kel, thuahthum kham ih mipi ṭhekdarh dan an hmang.

February 15, Mandalay ih lamzawh duhphorhtu pawl cu airgun le khuah-li hmangin an ṭhekdarh thok. Cuih ṭum ihsin online le media picang pawl in nasaten palik cetcangdan an soisel thok.

Cuhnu in SAC ralkap le palik pawl cu an hraang sinsin ih lamzawh duhphorhtu an ṭhenṭhek tik khalah thi ceu hai seh ti`n meithal phunphun an hmang thok ih mithat, thilfir phah in mipi thinlung ah ṭihkhurnak an thunlut thok.

Mipi in Humkham awknak an hmang thok

Ralkap ukhruai dodalnak cu rampihuap in February 6 ihsin a cak thok ih mipi lam thazang a cak sinsin tikah mipi ṭhekṭhentu palik lakah SAC ralkap hmuh ding an um thok.

Ralkap lam in hriamhrei meithal an hmang nasa thok ruangah mipi lam khalin February 27 ihsin thok, ralkham buuk le humhimawknak an tuah thok. Ralkham le humhimawknak ih an hmanmi pawl cu hnawmpung, concrete Lungbok, thir sangka hlu, tohkham hlun, thingṭek tivek an hmang ih cuvek pawl cu meithal hriamhrei lakih humhimawkdan ciikhat hrang ah a ṭhahnem zet tiah Yangon ih mino hruaitu Ko Min Kyaw in a sim.

Amah cun “himi ralkham thuahhnih-thum kan tuah mi hin ralkap le palik cetcang dan a ti muang ih kan hnen lam rat danding a ti harsa. Cusungah minung ṭhenṭhekaw man in relh danding khal kan tawlrel man. Cun bulpak zawngih humkham awknak khalah a ṭangkai zet” a ti.

March 1 hrawngin mipi ṭhenṭhek dingah palik bawmtu ralkap an tel thok ih duhphorhnak neitu mipi pawl cu dimdawihnak umloin an hrual ciamco thok ih kutthlak hnu ih kaihhkih tuar mi khal hmuh ding an tam thok.

Ko Min Kyaw khalin March thlathok lam in SAC ralkap hmuh ding an tam thok ih mitthlitlak bomb tivekkhal an hmang thok a ti.

Amah cun “hmaisabik ahcun voikhat-hnih an kap. Cuhnu ah rabar cerek lakah cerek ngai an rawi thok. Cumicu vansang ah an kap mi siloin mibur umnak bat rorin an kap mi a si” a ti.

Zingzoitu pawl ih hmuhsuak mivek a si le Yangon mipi ṭhenṭhek nakih cerek ngai an hman thok hi February 28 in a si. Zinglam ah palik 30 hrawng in mipi ralkham tuahmi an siatsuah thokih kaihkhih ding mino an hual ciamco hnu ah dung an siip sal.

Cutin voithum-li hrawng mipi an ṭhekṭhen hnu ah cerek ngai voi 10 hnakih mallo an kap ih mipahnih an kap that.

Yangon ah ralram vek rori`n an cangvai thok cu March 3 ah a si ih zingpit ihsin tlailam tiang lamzawhtu le lamziin ih sukso mipi an kap ciamco ruangah mithi 20 an luan.

March thlalai hrawngah mipi tha cak zetnak Yangon ramṭhen, မြောက်ဥက္ကလာပ, ဒဂုံဆိပ်ကမ်း, မြောက်ဒဂုံ, တောင်ဒဂုံ, လှိုင်သာယာ le ရွှေပြည်သာ pawl ah martial law an phuang ih dimdoih loin meithal phunphun thawn mipi an hrual ciamco ruangah cuih hmun 6 lawngah mithi 120 hrawng an um.

Cuhnu in “nan bop kan bat ding” tiah mipi an ṭhih hnu March 27 ah nasaten an cangvai ruangah rampihuap in cuih ni lawngah mithi 100 an luan, cumi ah kum 18 kim hrihlo nauhak 11 an tel.

Mipi ṭhenṭheknak le mithat nakih an hmanmi ralthuam/meithal

မြသွဲ့သွဲ့ခိုင် kah nak ih an hmanmi cu Israel ih suakmi meithal vek MA-13 a siih cerek ah 9mm an hmang. Mandalay tipikap khalah 5.56 cerek thunmi MA-1, MA-2 meithal an hmang. Cuih tlun ah ramdang mi mangbangter ṭheh theimi MAS sniper an hmang thok ih mipi ṭhenṭhek nakah ralram ih hmanmi kutken bomb an hmang tam.

March 27, တာမွေ ih mithi le March 28, Hlaing myone ih mikut an ti bul nak cu kutken bomb a si tiah a hmutu pawl in an sim.

March 29 khalah ဒဂုံ ih duhphorhnak mipi le an ralkham vutneel dip pawl pet ṭhehter theimi meithal/bomb tum an hmang. Kalaymyo khalah humhimnak ṭhiṭha hman neilomi mipi cu cuhnakih thacakmi RPG bomb thawn an kap.

Netalam cun rinloparal ah mipi ralkham buuk va siim lawng duhtawk loin mipangai vekih thuamhnaw an hruk ih duhphorhnak neitu mipi cu an rinlo lai ah an kai ciamco. Rinlolai ih cangvai an hmang. Cuih tlun ah mi motor tivek fir in midawinak ah an hmang ih lamziinpi khalah mipi an hrut phah vivo.

Khuasung an vak khalah an kutza a suak cun a hmuhhmuh an kap hluahhlo. March 27 khalah Ṭhaway myo ih motor cycle mawng mipathum an kap ih pakhat cu an kap that ngah. Cumi cu CCTV in a zuk ngah na cingin motor cycle accident ah a lu khawngin a thimi a si tiah ca an suah.

AAPP ih ngankhum mivek asile SAC ralkap kuttuar ruangih mithi hi April 9 tiangah 618 an um zo ti a si.

CNN palai thawn hmaton thusutnak an nei lai ah SAC ralbawi cun palik 10 le ralkap 6 telin rampihuap ih mithi cu 248 lawng an si a ti.

SAC ralkap pawl cun leitlun mipi hmai ah thianfihlimawk an tum nan media le mipi cangvaihnak zar ah a tuahmi thilsual le an tumtahmi tvk pawl cu leitlun mipi in an thei thluh.

An cetcangdan khal Daan thawn milawmi a si lo zia theihsuah a si vivo ih, CDM ih telve ကျိုက်မရော khua ih palik bawibik sangtu သန်းထိုက် cun “rampi Daan sungih um mi mipi ṭhenṭhek dan thawn a mil aw lo lawlaw. Meithal thawn mi an kap ih funghreu thawn khal mi an thawi. Cuvekcu kan ram Daan ah a um tel lo” a ti.

SAC Ralkap le Palik an hraang nak san

Atlun ih tarlangmi vekin ralkap le palik pawl cu a ninii in an hraang vivo. Cutiih an um san cu sia ṭha thleithiamlo dingin an thluak kholhfaimi an si ruang khalah a si thei ih tlunlam bawiupa pawl in sun zaan tiloin hna an ṭuan fial, ei le in ding khawpkham in an pe lo ruangah khal thin thawi mood fuh loin an um thei ih cuvek dinhmun an si cun tlunlam bawiupa pawl hman ih fial hran ṭul loin an thin tawkah a hraang zawng hlir in an cangvaimi a si thei tiah mithiam le zingzoinak neitu pawl in an sim.

Palikbawi သန်းထိုက် khalin cutin a zum ve ih “an thin diriamter nakah luan zetin an cangvai mi a si thei. Nan, a tuahtu khal an mawh ih a fialtu khal an mawh thotho. Lamzawh duhphorh timicu Daan pahbal ih cangvaihnak a si lo. Mithat, mihrem le a hraang zawng ih an cangvaimi cu mipi thinlung ah ṭihnak thunlut in mipi an control tummi a si” a ti.

SAC ralkap le a kuthnuai ih hnaṭuan pawl cun ramsa hman tluk lo, nunrong le hriamhrei ralthuam rinsan in mipi an hrem rero nan ralkap ukhruainak khawp neekneek zotu, zalenmi ukhruainak cozah dinduhnak lungput neitu mipi ih tumruhnak cu a ti hlo thei cuanglo ih mipi lam cun lamziin a um dandan hawlin ralkap ukhruainak cu an dodal rero a si. (Myanmar Now)

Leave a Reply

Your email address will not be published. Required fields are marked *