A burbur ih mipi an that mi cazin cipciar a suak

Ralhraang SAC ralkap in Kawlram pumhuap, mawh nei lo mipi a burbur ih an that mi cazin cipciar cu NUG ṭuanvonei Aung Myo Min in FB cahmai ah a pholang.

Tarlang mivek a si le kan ram a buai hnu, tuini tiang ralhraang ralkap in a burbur in mawh nei lo mipi 170 kim zik an that zo ti a si. Cukhalcu thuhla cipciar thei hrih lomi tampi a um thei lai.

A burbur ih mithatnak hi thahawk menmen siloin miphun ciikuang ti mit tum ti`n siseh, raldonak daan buar tizawngin fehpitheih a si ih hivek sual tuahtu cu human rights thawn pehparmi international thuṭhenzung tiang thlen theih a si ih, sual tuahtu cu napin an hrem thei.

Ralhraang SAC ralkap in a burbur ih mipi an that mi cazin cipciar

Min Aung Hlaing in rampi ukhruai thuneihnak a la hnu, a ralkap SAC ralhraang pawl in a burbur ih mi an that mi thuthang suak hmasabik cu Sagaing ram ah a si.

1. 2021, July 11 ah Sagaing ramṭhen, Kani peng ah mawh neilo khawmi 15 cu hmunkhat ah pungkhawmin an that. July 26, 27, 28, 31 pawl khalah Kani peng ah khawmi an that vivo ih July thla sungah a burbur ih thatmi miruak 40 an hmu.

2. 2021, December 7 ah Sagaing ramṭhen, Salingyi peng ah kum 14 ihsin 17 karlak mino 4 telin mawh neilo khawmi 10 pawl a burbur in an that.

3. 2021, December 24 ah Kayah ramkulh, Hpruso peng ah nauhak telin mawh neilo mipi 49 an urkaang that. Cumi ah Save the Children hnaṭuan 2 an tel. Hih thu cu leitlunhuap rorin a thang mi thuhlapi pakhat a si.

4. 2022, January 6 ah Chin ramkulh, Matupi peng ah mawh neilo mipi 11 an kai ih rapthlak zetin an that.

5. 2022, February 3 ah Sagaing ramṭhen, Myinmu peng ah ralhraang SAC ralkap that mi miruak 8 an sar. Mi 5 pawl cu urkaang that mi an si. February thla thotho ah Sagaing ramṭhen, Kalay peng ih nufa 3 cu ralhraang ralkap in an urkaang that ih, thlacem lam February 28 khalah Magway ramṭhen, Gangaw peng ah khawmi 5 an urkaang that.

6. 2022, March 1 ah Sagaing ramṭhen, Yae Oo peng ah PDF 3 telin mi 4 an urkaang that.

7. 2022, April 19 ah Shan ramkulh, Peyintaung khua ah mipa 9 an urkaang that.

8. 2022, May 12 ah Sagaing ramṭhen, Yae Oo peng ah Urkaang that mi miruak 28 an hmu.

Leave a Reply

Your email address will not be published. Required fields are marked *