2021 Dothlennak ih Dalan (ဒလန်) tambiknak ramkhel Party an phuangsuak

2021 Dothlennak hlawhsam dingah SAC ralkap ih ṭulpoimawhbik pakhat cu mipi sung thu thei suak thei dingin thlingthla saktu nei ṭha hi a si.

Cumicu rampi buai hlan ihsin an Lam tluang thei dingih an rak hmang ṭangkai zet zo mi khal a si.

Cuvek, SAC ralkap hmanfung pawl cu Dalan “ဒလန်” tiah an ko ih, Yangon ih palik tlan` pakhat sim vek a si le tuṭum Dothlennak ih Myanmar rampumhuap Dalan ṭuan tambik cu palik le ralkap pawl ih dinsuahmi USDP party (ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ) sungtel an si ti a si.

“Mipangai khal Dalan an si thei ko. Nan, USDP cu an mai` party a si tikah a mal maw tam ti si men. Pehtlaihawknak an nei cia tikah pehzomaw danding a olsam” tiah Mg Ba (hminthleng) in Myanmar Now hnen ah a sim. Amah hi ralkap ukhruainak duhlo ruangah CDM luttu a siih kum 3 lenglo palik ṭuanzotu a si.

SAC ralkap hmanfung tamsawn cu ramkhel, pursum lam ah an mah thawn pehtlaihawknak neitu le NLD party dodaltu pawl an si tiah tuṭum rampi boruak thlirtu le cozah hna rak ṭuan dahtu, an lungput theiciangtu pawl in an sim.

An mah Dalan pawl ruangah Dothlen cangvaih nakih teltu, CDM ih teltu, ramsung hminthang ralkap dodaltu le ramkhel tamzet in kaihkhih an tuar phah thluh tikhalin an sim.

Dalan an tam

Min Aung Hlaing hohami ralkap in rampi ukhruai thuneihnak an la hnu in rampumhuap Khuabawi le Veng lal tamzet cu hnaṭuan an bangter. Miṭhen sile an mah ten an cawl.

Cupawl aiawh ah duhtawk ih merhkawi theihmi an milai pawl an thunlut ih ralkap ukhruainak dodaltu kaihkhihnak le mipi cangvaih danding thuthup lak nakah an hmang.

Mihring tipithuanthum titiangih koh phu Yangon lamzawhtu mipi ṭhenṭhek in lamzawhtu umlo ding ko an tuah theinak khal hi Dalan pawl ruangah le Dalan an tam sinsin ti a langter tiah Yangon ih CDM teltu palik pakhat in a sim.

Amahcun “thuthup theilo hai sehla Yangon mipi an humreek theilo ding. Thuthup theilo hai sehla cu zianghman an tuah thei zik lo” a ti.

SAC ralkap pawl cu an neel lonak hmunram khal, an fehtlang zutzo theiih, inn dot sang zetzet khalah fehtlang hluahhlo in an kai duhmi umnak cekci an thei. Cumicu Dalan hnen ihsin thuthup an thei ruangah ngil zetin an cangvai theimi a si tiah boruak thlirtu pawl in an sim.

Yangon lawng silon, Mandalay lam khalah cuvek thotho. Kan dung bai ih mino ṭhenkhat an kai thu ah thuhla theiciangtu mipakhat cun an sungkhat naivai Dalan pakhat in a zuarthlai hai mi a si a ti.

Amahcun “Vengsungmi mipahnih a zuar zo. A hlan ih a pasal cu ပြည်ခိုင်ဖြိုး party a si. Zaan ih bungbeel tal pawl khal a zuk thup ṭheu. Amah cu a thi zo sapbei” a ti.

Yangon, CDM ih teltu TlangLeng zung ih hnaṭuan pawl fingkhawitu mipakhat khalin Myanmar Now hnen ah “Dalan pawl ruangah voihnih rori inn ka ṭhawn zo. Thuthup puuttertu cu Veng uktu zung lam in an si. Abikin USDP pawl an si ih Dalan ṭuan an tam zet” a ti.

Amahcun “Dalan pawl ih ruahban lomi pakhat cu mipi pakhat dinhmun in SAC ralkap kut kan tuar leh thei timi an ruat ban lo mi hi a si. SAC ralkap batbikmi cu mipi hi kan si. Anmahlak lala khalah za ah za an rinaw ngamlo ih mipi an hmuh dan, mipi par ih lungput an nei danding phei cu rel hran khal a ṭul lo. Cuvek a si tikah SAC ralkap lakih siatnak a thlen cun Dalan ih an hmanmi pawl khal an luat cuang zik lo. Nu le pa, sungkhat, unau le an fa le tiangin an tuar leh thei. Duh tikah an ko thei ih kutthlak soisat an tuar thei hleiah thihhlohnak tiang an tong thei a si” a ti.

Dalan pawl ih hlawknak?

Rampi a buai hnu SAC ralkap lam ṭangin an ṭhatnak aupitu le ralkap ukhruinak cohlang in lamzawh cangvaihnak ih telṭheu pawl cu mipi lam in ငါးထောင်စား (Thawngngaman) tikah an ko. SAC ralkap in mipi soisanak ih an hmanmi misual pawl khal ငါးထောင်စား (Thawngngaman) tiah an ko.

Rampi buaipek ih Thawngngaman an hmanmi pawl cu netahnu khalah Dalan ah an hmang tam tiah boruak thlirtu pawl in an sim.

Ahlan ahcun cuvek Dalan hnen ih ngahmi thuthang cu ralkap pawl in za ah za an ring ngam lo. Nan, rampi a buai hnu cun mipi thuthup laknak ih an hman bikmi ah an hung cang leh.

Dalan pawl cu Dothlennak ih mipi hrang ṭihnungbik ralpi pakhat an si ruangah rampumhuap hmun ṭhenkhat ahcun an kai ngah a si le mipi lam in Lukawng sak, mithmul ziatfai sak, an hmai ah Tattoo cuk sak le veng ihsin dawisuak tivekin a phunphun in an hrem.

Miṭhen ansile Inn le Lo urkang sak in that tiang an tuar. Cuvekih hrem an tuar nak san cu 2021 Dothlennak ih mipi hrang ṭihnungbik pakhat ih rauhmi an si ruangah a si.

CDM ih telvetu ralbawi Hint Hein Thaw Oo khalin Dothlen cangvaihnak ih kaihkhih tuar tamsawn cu Dalan pawl ruangah a si a ti. Curuangah Dalan thianfai ding hi thil thupi pakhat a si a ti.

Amahcun “Dothlennak lamziin dawnkhamtu an si ih kan thianfai lo cun kan tumtahmi nasaten a khawng ban thei. Kan ral pawl in kan sung thu thei ding a si hrimhrim lo. Dalan pawl in kan khuakhanmi kan ral hnen an sim thei tikah kan hlan ah an cangvai man ringring. Tuṭum thu ahcun cangvai hmasa sawntu an lam tluang. Netasawntu cu an tuar ringring” a ti.

Dalan pawl in ziangvek hlawknak an hmu timi thu ah “thuthup an theihmi ih zirin hlawknak an hmu ve. Paisa sumsaw lozawng khalin hlawknak/sinak hmutu/ngahtu an um. Cun, ṭihnak ruangah mahsung lala ih Dalan ṭuantu khal an um. Cule party huatawknak ruangah hlawknak umlo khalih Dalan ṭuan an um” a ti.

April thla tawp lam in ralkap pawl ih hmanfung Dalan pawl lakah pukmah 505 (က) orhtermi an um ih cupawl thuthawn pehpar in ramkhel thiamsang U Than Soe Naing cun “mipi bumnak ah an tuah hrimmi a si thei. 1988 kum khalah himi tactic an hmangih Dothlen cangvaihnak ih tel pawl lakah buainak tumzet a rak suak ter. Tuṭum khal hi kha lai vek thotho a si ko ding” a ti.

Mipi hmalakdan

Sagaing ramṭhen, Kalaymyo ih innsang pakhat cu Dalan an si ti theihcian a si ruangah veng sung ihsin dawi an tuar ih hmun dang an ceer tumnak khalah cohlang duhtu neiloin vava an tum.

Shwebo ih khua pakhat khalah Dalan tiih ruahmi mi pahnih cu naam thawn an sat that. Hawi bang thei nawnlo ding tiang vuak thawi tuar khal an um.

Cuvekih mipi cangvaihnak a um ruangah SAC ralkap cun an hmanfung/milai Dalan pawl hum in “veng sungih mi dawi suak, Lukawng sak, mihmul ziatfai sak, Hmai ih Tattoo cuk sak” tivekcu hmuhsuamawknak pakhat a siih Daankalh a si ruangah a tuahtu pawl cu hrem an si ding tiah thu an phuang.

Asinan, National Unity Government ih ṭuanvonei U Aung Myo Min cun “Ukhruai thuneihnak an la hnu in kan ram ah adikmi Daan ṭhiṭha a nung lo. Mihring pianvo zawngih vun zoh cun zovekin an tuah khal a si le Daan pahbal a si. Asinan, atu kan ram dinhmun ah cuvek hremawknak thawn pehpar in Daan thawn milaw ih report nakding khal a um lo. Rampi Ukhruaitu ka si tiawtu rori`n Daan an pahbal tikah thu feh danding a harsa.”

“Dingfel hngetkhohmi Daan le Dun nung bang sehla mipi lam cun thudik lam ah ṭangin a dikmi an dinpi ding. Nan, tuahcun Daan mumal a umlo hlei ah a ding` felmi thuṭhenlairelnak a umlo. Curuangah mipi lam cun adik tiih an ruahmi cu mahten Lairel khuakhang in hmalaknak an nei rero a si” a ti.

Mipi lam khalin 2021 Dothlennak ih mipi hrang ṭihnungbik pakhat cu Dalan pawl hi an si timi an theifiang ruangah bulpak zawng khalin siseh pawlkom zawng khalin Dalan an thianfai vivo.

Hmailam tikcucaan khalah tuhnakih caksin in Dalan thianfainak nei thei sehla a ṭha ding tiah ruahnak a um ruangah rampumhuap ih um Dalan pawl cu an hmakhua a pit vivo ding a si.

Leave a Reply

Your email address will not be published. Required fields are marked *