2008 Daanhrampi ṭhiat bal fel a si zo thu CRPH in a phuang

Kawl ralkap pawl in rampi ukhruai thuneihnak laknak ih an hman mi 2008 Daanhrampi cu March 31, zaan nazi 11 kim zik ah Committee Representing Pyidaungsu Hluttaw – CRPH in ṭhiatbal fel a si zo tiah ca suah in tlangthannak an nei.

CRPH ih casuahmi ahcun “2008 Daanhrampi kan bal san cu ramsung Tlangpar miphun kim huappi ih beisei mi dingnak le tawkzawn ruah thiamnak, bangrannak le zalennak dik ah hram a bun mi Democracy zalennak le mahte ukawknak pompi theimi Federal Democracy sersuak dingah a si.”

“2008 Daanhrampi cu ralkap ukhruainak hram hnget tertu le san sau tertu hrang ih sermi a si ih Federal Democracy dinsuahnak hrangih khamtu pakhat a si.”

“Ralhraang ralkap pawl in 2021, February 1 ah 2008 Daanhrampi pahbal in Myanmar kumpi cozah thuneihnak a lak ruangah cuih Daanhrampi cu bal ṭheh a si zo.”

“Ralkap ukhruainak tawpter ding, 2008 Daanhrampi ṭhiatbal fel ding, Federal Democracy sersuak ding in le mipi hril tlin mi cozah dinsuak ding ti`n ruahrel lungkim mi Federal Democracy cu Myanmar ram ah sersuah a si zo.”

“Curuangah Committee Representing Pyidaungsu Hluttaw cun 2008 Daanhrampi cu 2021, March 31 ah a ṭhiatbal fel thu a phuang a si” tiah an ngan.

Leave a Reply

Your email address will not be published. Required fields are marked *