Tidai hua NATNAK danglam “Aquagenic Urticaria”

Minung taksa hrang ih thil thupibik cu tidai a si. Kan thluak le thin zaṭek 70% ah tidai a tel. Kan cuap khalah zaṭek 80% tidai a tel ih kan ruh zaṭek 30% khal tidai thotho. Kan nun theinak dingin nikhat ah tidai 2.4 litres in a ṭul. (Nitin kan ei-in mi pawl ah tidai a tel thluh)

Kan taksa hrangih thupi bikmi tidai hua nat danglamzet pakhat a um. Cucu aquagenic urticaria tiin an ko ih cuih nat a neitu cu tidai a tham/in a si le a taksa (vuun) a bol, sen, vunnat nei vekin a um.

Leitlun ah himi nat neitu minung 50 hrawng lawng an um. Natneitu in tidai abual asile a taksa ah a lang. A tham men khalle a lang thotho. Thlan suak le mithli luang men khal ah a taksa a na ih a sen hlei ah vunnat nei bangin phar vekin a um.

2019 ah kum 23 mi Rachael Fetter in hih natnak a nei ih tidai a tham tinten a taksa sen in a bol thluh. A thlan suak men khalle a taksa a sen thluh ih tidai a in khal sile 120ml hnak ih tam a in ngamlo.

Rachael Fetter cun, “kum 18 ka si hrawng in tidai ka bual le ka taksa a sen thok. Sappia ka hmang mi ṭha lo siding tiin a dang ka thleng nan a ṭhahnem cuanglo. Cutin a luar vivo ih tii kabual ṭheh tinten a nattuk taakah ka ṭap ringring. Nan, 2019 lawng ah vuun doctor hnen ah ka hmuh ih, cumi in Aquagenic Urticaria (tidai hua nat) a si timi kan thei suak. Asinan, doctor pawl cun a enkol dan ding le tidam danding khal an theilo.”

“Himi ruangah zerhkhat ah tidai voi 2 lawng ka bual ngam. Cu hman cu natsawknak ka ei hmai a ṭul. Ka lu ka khawl duh ruang bikah ka bual aw ṭheu. cu hman cu minute 5 lawng tidai ka tham ngam. Tihlum in ka bualaw le a nat luarkai ruangah a dai mi thawn lawng ka bualawk. Cu hman cu ka taksa meisa kaangmi vekin a ling ih ka ke a bol thluh ruangah tibual ṭheh veten ka to ta ṭul.”

“Tidai inding a si khalle voi 1 in ah 4oz lawng ka in ngam. Tamdeuh ka in a si le ka luak ih ka pum in a celh lo. a ling thluh. A har mi pakhat cu ka taksa bol cu nazi 1 sung hrawng ah a hlo, nan nikhat sung ka taksa a na. meisa kaang vekin a ling.”

“Uite hruai in park sungih ka vak khalle ka thlan a suak cun ka taksa an sen ṭheh ih a bol tlun ah a na lawlaw siko.”

“Himi natnak hin ka nun lamtluan a hnor zet. Tidai khal ka leuh ngamlo, ruahsurlak khalah ka um ngamlo. Vuur khal ka tham thei lo. A caancaan ahcun ka nundan ka ning zet, Nan, ti theimi ka nei cuang lo ruangah remcang thei bikih um ka zuam.”

“Nikhatkhat ah himi dam theinak sii an hmusuah leh ka beisei. Nan, cumi ni a thlen hlan tiang sii ei in le roo theibikin ka um ṭul a si” tiin Rachael cun a sim.

Hih natnak thawn pehpar awih ngankhumnak hmaisabik cu 1963 ah a si. Ziang ruangah a suak tikhal theiciangtu an umlo ih tu ni tiang hih natnak damter theituding sii khal a suak hrih lo.

(Natnak neitu zuk cu FB in a siang lo ruangah kan telhlo a si)

ref:ScienceAlert,wiki,BSC

Leave a Reply

Your email address will not be published. Required fields are marked *