Thih Khat Ka Luat Ni

1990 : “Zinglam nazi 7:20 ah Malaga, Spain ram lam pan dingin BA 5390 vanzam thawn Birmingham ihsin kan pok suak.

Minute 15 kim hlan ah Oxfordshire khua tlun feet 17,300 sang hrawng kan zuang lai ah awn ringzet ka thei dukdi ih miṭhep karah ka rualpa Captain Tim Lancaster cu vanzam sangkate lam ih thli in a zuuk ih a zuuk liam hlan ah a taikhap in ka kai man.

Ka zoh ciang cu vanzam sangkate thlalang a pong mi ihsin thli in a rak zuuk mi a si. Thli le a caktuk ih a ke lawng vanzam sung ah a um ih a taksa ruangpi cu vanzam leng ah thli in a seep dutdo rero.

Thlidai in, inzuuk nakah ka hmaivuun a pong ṭheh vekin ka thei. Ka kut khal a zeng thluh a bang. Asinan chief steward John Heward le flight attendant Simon Rogers in, in kai bawm ih ka taksa zawng cu a tizia saal.

Thlihrang in a khawng nasa tukih karual Tim Lancaster cu a thi zo ding kan zum. Asinan a ruang kan thlah pang a si le vanzam thla engine sungah a lut dingih kan zaten ka thi thluh ding fawn. Curuangah celhlo cingten leithuai kan thleng tiang kan kaai ṭenṭo.” tiin Flight attendant Nigel Ogden cun a sim.

1990 kum ih thilthleng a siih vanzam cangsual nakih danglambik ti ih hminkhummi khal a si.

Birmingham ihsin Spain ram pan ih an zam lai ih thil thleng a si ih vanzam a hmailam thlalang hrennak bunsual ruangih vansiat an tong mi a si.

Khual an tlawng hlan zaankhat duh ah vanzam thlalang an hrennak bolt a fate deuh an hmang pang ih tlunvan an zuanghnu minute 15 kimzik hrawngah vanzam hmailam thlalang a pong ih vanzam mawngtu Tim Lancaster cu thli in a zuuk suak. Vanṭhat nakah a rual pi pawl in an kaai man ih, Cutin, emergency in Southampton Airport ih an ṭum tiang thlah loin an kaai. Minute 22 sung a rei.

Captain Tim Lancaster cu vanṭha in a rak thi loih siizung lam ah an panpi lohli. A vorhlam kut ruh, a kut kehlam zungpi le a vorhlam kut ngel a khawngaw ih, siizung ihsin a suak hnu thla 5 hnu ah hna a ṭuan thei saal.

Hih Vanzam cangsualnak cu a danglamtuk ruangah National Geographic Channel in vansiatnak an tondan vek ciahin an cawngsaal ih TV ah an thlah a si.

ref:NatGeo,Wiki

Leave a Reply

Your email address will not be published. Required fields are marked *