Singapore ram ah himi 11 na tuah cun Thawngtlak lole Paisa Cawhkuan na tong ding

Leitlun ram tinkim hin a danglam cuang mi Daan le Dun kan nei ih Singapore ram khal in a danglam cuang mi Daan tam zet a nei. Leitlun ih ramthiangfai le ṭhangsobik ram lak ih tel ban ve mi ram pakhat a si ih an ram ih Daan danglam ṭhenkhat kan zoh tlang hnik pei.


1.Chewing gum
Dr. sian nak thawn hriselnak hrang ih ei le zuar bak lo cu an kham. Kum 1992, Goh Chok Tong Prime Minister a tling kum ihsin a kham thok. Chewing gum zuartu cu Singapore $100000 lole kum 2 tiang thawngthlak theih a si.


2.Wi-Fi Fir Hlah
Tulai Wi-Fi hmangtu tamsawn cun password an bun ih, mi Wi-Fi hack sak in na fir pang a si le Singapore Computer Misuse and Cybersecurity Act vekin $10,000 lole Kum 3 thawngtlak theih a si.


3.Ek-inn tidai tawih hngilh cun….
Leitlun ram thianghlim lak ih tel ban ve mi ram a si vekin thianfainak uar zettu ram an si ih khuatlang ek-inn na hman tikih tidai na toih lole $150 cawhkuan si mei.


4.Khuatlang dathleka (elevator) ih zun thawh
Online video ah kan hmu ṭheu ding. Elevator sung ih zun thawh hmang huatsuak an tam zet. Ramdang ahcun ngai thiam a theih khal si men thei nan, Singapore ah cun a theih lo hrimhrim. Khuatlang elevator sungah Zun theithiam mi device an bun thluh ih zun na thawh pang cun a awn ciamco dingih cawh kuan ter dingin an lo pan hngalh ding.


5.Mi hmuh ah Taklawng ih um
Khawlak sim lo Inn ih na um khalle mi hmuh dingin tawlawng in na um le cawhkuan $2000 lole Thla 3 thlawngtlak. Na umdan ih zir a si ih a pahnih khal in na tuar thei.


6.Laileng rawl pek
Bread na ei hlei mi Laileng vate na pek pang cun paisa bawm na phorh cia ṭul. Singapore cozah in khawlak tlang mi vate rawl pek an kham ih na pek pang cun $500 an lo cawh ding.


7.Khawlak ih hnawm hlon
Kan sim cia vekin Singapore ram cu thianhlimnak uar zet mi ram a si. An ram mipi hrimhrim in duhduh ah hnawm an hlon dah lo. Khawlak ih hnawm hlon cu a zah thlak hlei ah na hlon pang cun $1000 an lo cawh ding.


8.Duhduh ih cilphui a theih lo
Kan nih Kawlram le India ram khuasung hmun ṭhenkhat ahcun kuva tii phui nak sendup in a khat. Singapore ahcun kuva sim lo duhduh ih cilphui a theih lo. Coffee dawr, bazaar, tlawnginn, cinema zung, bus colh nak le khawtlang mipi ih hman mi ziinpi pawl ah cil na phui le $1000 an lo cawh ding.


9.Khualai ah lek an siang lo
Traffic zaam theinak mawṭaw ziinpi ih Plastic/cahnah vanzam thlah lole lehpannak dangdang lek an siang lo. Traffic zaam hin mi caan a lak zet ti cu kan thei cio ding. Singapore cu ramṭhangso a si vekin tikcucaan an upat zet ih lehpannak thawn pehpar in Traffic zaam ding khawp ih cangvaihnak na nei pang cun $5000 tiang an lo cawh thei.


10.Rimawi thawn mi hnaihnok
Mi hnaset ding khawp in khawtlang tlanlennak ih rimawi tum a theih lo. Khawtlang mipi tlanlennak ih rimawi na tum cun $1000 an lo cawh ding.


11.Duhduh ih lamziin kaan a theih lo
Ziin kaan lilawn lole zibra crossroad zawh lo ih ziin kaan khal Singapore Daan pahbal thotho a si. An lo kaingah pang cun $50 na kuan ding ih voi 2-3 Daan na pahbal bet cun $1000 lole thla 3 thawngtlak cawhkuan na tuar ding.

ref:reddit,wiki

Leave a Reply

Your email address will not be published. Required fields are marked *